Tin vários hende hopi serka di futbòl ku ta insistí ku: Ramiro lo no haña sosten pa keda presidente…

Deporte 5 Star tabatin kombersashon último dianan ku vários hende di futbòl ku ta sigurá nos ku e hóben presidente di Federashon Di Futbòl Di Kòrsou ku ta Sr. Ramiro Griffith lo no konta ku sosten di e mayoria pa keda komo presidente di e federashon.

Na sèptèmber lo mester tin reunion general kaminda lo bai tin votashon pa un direktiva nobo.
Si bai tras di loke bo ta tende, ta, ku Sr. Ramiro Griffith no ta gosando di apoyo di vários organisashon di nos futbòl, i ni tampoko di “Delegadonan” ku ta hopi poderoso.

Ta akusá e hóben presidente di ke bini ku su “hendenan” pa asina tuma mando den futbòl, hasi i deshasí.

Otro ta bisa ku e la drenta bon, pero ku últimamente Sr. Griffith ta mustrando otro kara, esta unu di arogansia.

I ku ta manera ku e ta privilegiá sierto grupo.
E presidente kier a kòrta den supsidio ku klupnan ta haña, pero klupnan a rechasá esei kategorikamente, ya ku mayoria di klup ta “bludu” paso no tin spònser.
Un konosido dirigente ayera nochi a bisa nos ku ta mihó ku Sr. Stanley Coffie a keda.
Den seno di e direktiva tambe tin vários miembro ku no ta di akuerdo ku e forma ku e hóben dirigente ta hibando su maneho. Di tur manera hopi interesante. Pa korant bende mester tin kos interesante naturalmente.