Tin rekuperashon di turismo pero tin preokupashon tambe si e ta dura

CHATA ta raportá sifra di okupashon di hotèl

WILLEMSTAD. E presentashon di CHATA pa luna di sèptèmber, kompará ku sifranan di okupashon promé ku COVID-19, ta mustra un diferensia chikí di -2.7%. Esaki ta nifiká ku sèptèmber unbes mas tabata un bon luna pa e hotèlnan mas grandi.

Apesar di e pandemia ku mundu ta aden ahinda, jüli i ougùstùs a mustra sifranan di rekuperashon eksepshonal. Jüli 2021 a asta presta mihó ku jüli 2019. Esaki pa gran parti tabata pa motibu di e periodo di fakansi i tambe ku turistanan Ulandes ahinda tabata haña nan tèst di COVID-19 kubrí pa gobiernu. Speshalmente pa famianan esaki ta un punto importante ku ta determiná si nan lo bai ku fakansi. E kobertura di bakunashon relativamente haltu riba nos isla tambe a kontribuí, i e situashon di kasonan nobo i pashèntnan ku COVID den hospital ta bou di kontròl. Tur e argumentonan aki ta faktornan ku ta determiná si un turista ta bishitá nos bunita isla.
Normalmente sèptèmber ta un luna di low season ku un okupashon un tiki mas abou na hotèlnan grandi. Apesar di esaki, CHATA ta kontentu di mira ku e diferensia kompará ku sèptèmber 2019 ta asina minimo (-2.7%). Maske esaki no ta kompensá e promé mitar di aña menos bon. Aún mas importante, e tendensia di rekuperashon ta kontinuá ku hopi atenshon pa dezèmber, ku normalmente ta un di e mihó lunanan di aña pa Kòrsou.
Na sèptèmber di 2021 Kòrsou su hotèlnan mas grandi tabatin un okupashon di 65%. Kompará ku 2020 (33.2%) esaki ta un oumento di 95.7%. Mihó ahinda, si nos wak e sifranan di okupashon promé ku COVID (sèptèmber 2019) esaki ta un bahada di solamente 2.7%. E tarifa promedio diario tambe a oumentá kompará ku 2020 pa $173.57. Kompará ku 2019, esaki tambe ta un oumento di 25.3%. Pa loke ta trata e entrada pa kamber disponibel, sifra ta indiká un oumento di 200% kompará ku 2020. Di $37.57 na 2020 pa $112.74 na 2021. Asta kompará ku sifranan promé ku COVID, e entrada pa kamber disponibel a oumentá ku 21.9%. Kòrsou ta tambe na di dos lugá pa loke ta trata okupashon di mas haltu, kompará ku otro destinashonnan den Karibe, mientras Karibe ta mustra e rekupershon di mas fuerte mundialmente. Pues un rekuperashon kla i fuerte ta notabel, asta kompará ku otro destinashonnan di fakansi den Karibe.

Rekuperashon ahinda ta hopi fragil
Durante e promé análisis di sektor di turismo aña pasá, tabata premirá ku lo tuma 1-3 aña pa e sektor rekuperá i bolbe pa e prestashon manera den komienso di 2020. Ta juli di e aña aki numa nos a kuminsá mira señalnan di rekuperashon. Ta interesante pa mira ku e rekuperashon ta bayendo mas lihé ku a spera, sinembargo e perdidá ta keda imenso i situashon ahinda ta hopi fragil.

Prekupashon enkuanto efektonan di medida di entrada ku QR
CHATA i CASHA i nan miembresia ta prekupá ku e medidanan resien anunsiá enkuanto introdukshon di kódiko QR ku a keda implementá di un forma muchu aprupto. Tin tambe raportnan positivo, por ehempel, ku nos por aseptá turista bakuná entrante 27 di òktober ku menos tèst, basta nan por prueba un kódiko QR. Sinembargo, apesar di e señalnan positivo, tin inkientut tambe bou di miembronan di ambos grupo di interes. Kòrsou ta un di e destinashonan di fakansi haltu riba lista den periodo di invierno. Pero esaki lo keda asina ya ku nos ta e úniko pais ku ahinda ta eksigí 2 tèst di e turista bakuná ku no por generá un kódiko QR komo komprobante?