Tin Parlamentario ku ta hasi biahenan di ‘bon bida’

WILLEMSTAD – Luigi Faneyte (PAR) tin kritika fuerte riba e loke e ta yama biahenan di bon bida di parlamentarionan. Na varios okashon Luigi Faneyte a referi na e malkontentu di su persona i di komunidat relashona ku e kantidat di biahenan i gastunan di parlamentario. Segun Faneyte tin indikashon ku último tempu ta trata di biahenan ku no tin balor agregá.
‘’Ta trata mas bien di biahenan di ‘bon bida’, segun Faneyte ku a sigi bisa por tuma nota ku práktikamente tur siman tin parlamentario ku bai den eksterior. Segun e sifranan ku Faneyte ta disponé di dje, e kantidat di biahenan a surpasá e loke ku tin presupuestá pa henter ún aña pa biahenan pa parlamentarionan . Ta trata di mas ku shen míl florin, ku kua a surpasá e suma presupuestá: ’Ma kompronde ku aworaki e gastu ta di 400 míl florin’’ . ‘Esaki siendo ku e pòchi pa finansia biahenan tabata 300 míl florin pa Parlamento’’.

PLAKA DI DIA
Luigi Faneyte ta referi tambe na e asina yamá daggeldvergoeding, plaka di dia ku e parlamentarionan ta risibi pa kada dia ku nan ta den eksterior.
Segun Faneyte tin sierto parlamentario ta risibi plaka di dia, ku por varia entre 21 pa 27 míl florin. Esaki ta lanta e pregunta si e parlamentarionan aki di berdat ta yu di Kòrsou, kaminda ku e realidat ta ku e situashon sosio ekonomiko finansiero den kua pais ta, no ta bon.
Tin hopi yu di Kòrsou ku den pèrtá i tin mas ku 60 míl yu di Kòrsou ku no tin un trabou. E politiko a sigi bisa ku tin más ku 27 míl yu di Kòrsou ku a bandoná Kòrsou , pasobra no tin pespektikva pa nan. Mientrastantu tin parlamentarionan ku ta gana 13 mil florin ku ta sèn dje pagadónan di belasting. Riba nan salario, segun Faneyte, e parlamentarionan ta risibi varios fasilidat. Riba esaki awor e parlamentarionan ta bringa pa biaha pa bai entre otro Jamaica, i Atlanta i ken ta haña kuantu daggeldvergoeding. ‘’Bo ta puntra bo mes, enberdat e hendenan aki ta traha pa pueblo òf pa benifisiá nan mes ?’’. Faneyte ta konkluí ku pa medio dje snoepreisjesnan, parlamentarionan ta haña sèn di dia ku nan ta usa pa kompensá e 25 porshento ku nan a pèrde, durante di último dos aña.
Faneyte ta enfatisá ku tarea di un parlamentairio ta pa presenta proposishon di lei konhuntamente ku gobièrnu, traha proposishon di lei i pasa proposishon di lei i tambe kontrola maneho i ehekushon di gobièrnu. Ta pesei ta skoge e parlamentarionan i no pa biaha pariba’pabou. ‘