Tin indikashon fuerte: Hulanda ainda lo no ta pidi despensa pa su pasado di esklabitut

DEN HAAG – Durante di e konmemorashon anual di abolishon di sklabitut, gabinete hulandes lo no pidi despensa pa Hulanda su partisipashon den e pasado di esklabitut. E ministernan di  VVD, CDA, D66 i Christen Unie, mester di mas tempu, pa tuma desishon riba e topiko sensibel aki.

Asina varios fuente a informá NOS na Hulanda.

Esaki no ta nifiká ku hamas lo pidi despensa na desendentienan di katibunan prosedente di Surnam i Karibe. Asina fuentenan na Den Haag ta enfatisá.

Pero gabinete hulandes ke debati promé ku esnan involvi, riba e konsekuensianan di awendia, debi na sklabitut.

E luna aki na dos okashon a diskuti e pidimentu di despensa durante dje reunion semanal di konseho di minister.

Diabierne awor, 1 di juli ta Keti Koti, e konmemorashon anual i selebrashon di abolishon di sklabitut na 1863. Tradishonalmente un representante di gobièrnu ta presente.