Timochenko eks hefe di FARC a rekonosé ku e ta responsabel pa mas di 20.000 sekuestro na Colombia

BOGOTA – Rodrigo Londoño mihó konosí komo Timochenko a aseptá su responsabilidat komo eks hefe di FARC pa un kantidat di krímen horibel kometé na Colombia.
Lokual ku a hala atenshon di e testimonio di Timochenko ta ku ela konfesá di a ordená pa laga sekuestrá mas ku 20.000 persona durante ku e tabata hefe di FARC.
Durante oudiensia den korte otro eks hefenan di FARC ku ta Pablo Catatumbo, Julián Gallo, Pastor Alape, Milton Toncel, Rodrigo Granda i Jaime Alberto Parra tambe a aseptá nan kulpabilidat di krímennan horibel kontra hopi hende na Colombia.
E krímennan manera sekuestro, tortura i asesinato nan aki a tuma lugá na diferente parti di Colombia entre 1990 pa 2016.
Wes Julieta Lemaitre ku a presidí e seshon de korte a indiká ku pa e eks lidernan di FARC evitá di bai prizon nan mester haña pordon di nan víktimanan.
Korte lo bai tuma por lo ménos tres luna pa bai tuma un veredikto di lokual a keda divulgá den korte.
Den kaso si kondena e eks lidernan di FARC nan lo por keda kondena pa por lo ménos 20 aña di kastigu di prizon kada unu.