The Lab Boutique Digital Marketing Agency ta kuminsá un tremendo kolaborashon ku Agensia di Merkadeo Digital rekonosí mundialmente: NY MDC Partners Inc. (Nasdaq: MDCA)

Willemstad, Curaçao. Durante e temporada sin presedente akí, mas i mas kompanianan ta haña nan ta bai digital. The Lab Boutique Digital Marketing Agency, un agensia di merkadeo online ku ofisína entre otro na Kòrsou, ta yudando for di 2012 mas ku 120+ kompanianan i organisashonnan pa establesé nan presensia digital. Merkadeo digital ta un nesesidat pa kompanianan awendia, i keda na e vanguardia di e kampo asina dinámiko aki ta un prioridad na The Lab.

The Lab ta orguyoso di anunsiá ku den april 2021, e agensia a drenta un kolaborashon ku NY MDC Partners Inc. (“MDC”). MDC Partners ta un di e retnan di merkadeo i komunikashon di mas influyente na mundu, basá na New York. E ta wordu selebrá pa su sosionan inovativo den propagandanan, relashonnan públiko, branding, merkadeo digital, social i di evento, kual ta responsabel pa algun di e kampañanan mas memorabel i efektivo pa algun di e markanan mas respetá na mundu. MDC resientemente a kombiná forsa ku The Stagwell Group, kual ta un grupo di komunikashon i merkadeo di servisio kompletu i prinsipalmente digital, i ku esaki kombinando e talentonan eksepshonal di MDC i e plataforma di teknologia avansá di Stagwell.

”Nos ta sumamente entusiasmá ku nos kolaborashon cu MDC, un kompania ku ta rekonosí pa ta un di retnan di merkadeo i komunikashon di mas influyente na mundu,” Diederik Kemmerling, CEO di The Lab, a bisa. “E partnership aki ta marka e siguiente kapítulo den nos dedikashon kontinuo pa sirbi nos klientenan den Karibe i Latino Amerika ku servisionan i kapasidatnan ekstendí.

Resientemente, MDC a añadi nuebe afiliadonan global komo un manera pa ekspandé su ret di talento den Latino Amerika, awor konsistiendo di timnan di agensia na Aruba, Costa Rica, Colombia, Kòrsou, Mexico, Nicaragua, Panama, Spaña i Merka. Aparte di Latino Amerika, te ku dia di awe, e programa di afiliadonan global di MDC a establesé su presensia den Medio Oriente, Europa Oriental, Taiwan, Mainland China, Hong Kong, India i Rusia, ku e meta di tin 50 afiliadonan global rònt mundu na final di 2021.

Komo parti di e partnership, The Lab lo tin akseso na MDC i The Stagwell Group su kolekshon di kapasidatnan kompletu i lo establesé “co-located teams” rònt mundu. The Lab lo kuminsá duna turno na koleganan di su team pa por traha na e ofisina di MDC i Stagwell den e World Trade Center na New York for di Sèptember. Pa yuda kondusí na kolaborashon entre MDC y su ret di afiliadonan, e grupo lo hasi uso di Locate, kual ta un sistema proprietario desaroyá pa The Stagwell Group. Locate ta un plataforma SaaS ku ta konektá technologonan, kreativonan, y klientenan rònt mundu den un solo plataforma na mes momentu.

The Lab ta sumamente entusiasmá di traha huntu ku MDC i Stagwell pa kombiná nan konosimentu di merkadeo lokal ku e mihó praktikanan den kampaña internashonal di merkadeo digital di eskala grandi. Esaki lo hiba na un nivel aun mas haltu di konosimentu i servisionan ofresé na klientenan di The Lab.