The Big Battle awe…. ABVO lo no kai den provokashon di kanga saya ku Silvania

WILLEMSTAD. Awe of mañan e sindikato ABVO i Minister di finansa Silvania lo sinta na mesa pa mira kon ta bai resolvé asuntunan finansiero ku gobiernu debe e amtenarnan ya ku palabrashon ku Hulanda, gobiernu di Kòrsoui no por tin defisit riba presupuesto.
I sin defisit no por paga overtaim di polis of mester kita overtaim di otro ministerio pa paga polis pero esei bo no ta tene Pisas ni Silvania bisa.
Pero lema dje aña’ki ta: segun palabrashon ku Hulanda no por tin defisit riba su presupuesto i portador lokal dje mensahe ta CFT ku a indika kaba ku kada minister ta responsabel pa kontrol dje gastunan bou di su kontrol.
E liña kòrá den e kangamentu di saya aki ta reportadamente ora CFT a manda bisa ku Minister Hato su kontrol riba gastunan mester di atenshon. Den e kaso aki Gobiernu i parlamentto a aproba presupuesto di polis pe aña aki i a hinka 3 mkion florin pa overtaim pa henter aña sin realisá ku Kuerpo Polisial ta monster kju mester di un multiple kantidat di mion pa aña pa satisfase nan hamber.
E ‘bief’ entre Silvania i Hata ta si surpasa e montante presupuestá – loke a pasa aña’den aña’fo – esei ta problema pasobra si polis no kobra overtaim nan ta welga i a bati na porta di minister di Finansa.
Minister di Finansa kende no ta fies di un round di kanga saya mesora a bisa Hato i su partido ku nan mester tuma medida pasobra overtaim a bira struktural – o sea parti integral di nan salario – kombina ku skarsedat di personal ta krea un desaser i ta ministerio di Hustisia mester buska solushon.
Mala suerte dje pais aki ta ku for di tempu tabatin minister manera difuntu Ronchi Isa i alto komisario manera Johan Oldenboom, a purba remediá e herida ku pleister na lugá para a lo macho i tuma medida.
Pasobra no solamente a tuma mas polis den servisio pero tog e problema a persisti i bira mas grandi den tur sentido. E problema a bira asina grandi ku mester di kuater sindikato pa representá i atendé problemanan di polis!! Ki e perspektiva?
Minister di Finansa no ta manehá Ministerio di Hustisia pero tin ku sòru pa no surpasa e presupuesto ki ròl di Minister di Hustisia ta pa sòru ku e pòchi pa paga overtaim tin ku yega e fin di aña. Pasobra ora sèn kaba ta drama a bai tin!