Tesis nobo ministerial: Minister Cijntje: “Subida di preis di pan ta kos bon!”

WILLEMSTAD. Ayera tabata reina un impreshon konfuso ora ku minister di Desaroyo Ekonomiko Cijntje a bisa ku subida di preis di pan ta un kos bon.
Nan a kuestioná i saka su deklarashon for di konteksto segun Cijntje pasobra loke ela bisa ta ku si un panadero ku ta traha pan mira ku tur otro subi preis pero e redusi preis, e ta bende mas pan i hasi mas ganashi i asina merkado ta regula su mes.
No ta konosi ta kua konsehero a skirbi e ‘tesis’ aki pa minister Cijntje pero e deklarashon a sirbi pa shòk e parlamentarionan un ratu i lanta nan for di nan siesta.

PANADERIA KLANDESTINO
Un otro tema ku a bin dilanti ta e supuesto kompetensia deshonesto di panaderianan klandestino i di toko ku supermarket ku ta hòrna pan ku ta bin mitar hòrna i no mester di pèrmit pa subi preis di esaki.
E minister a atmiti ku no tin sufisiente kontrol pero ounke gobernashon ta kontinuashon, no por kulpa e minister pa e situashon aki ku a krese historikamente na Antia antes i na Kòrsou despues.
Pa suavisa e impakto di kompetensia deshonesto a nombra sinku kontroladó nobo. Pa loke ta movementu den haf, ultimamente tur kos ta kana nechi i tini chassis nobo riba kaya i merkansia ta sali muchu mas rapido.
E minister a anunsia ku lo bai tin redukshon di preis di awa i koriente ku 19%.
A instalá un komishon di food security i e maneho lo ta pa intensiva kontrol.
Steven Martina a puntra kon bin preis di gasolin, awa, webu i pan ta subiendo i Cijntje su vershon ta ku nos ta enfrenta inflashon kousá pa gera i pandemia den oro pais i ku kos lo sigi subi pasobra nos pais ta importa praktikamente tur kos.
Komersiantenan tambe tin ku kontribui na stabilisa preis pasobra ultimo biaha ku preis di webu a subi tabata na 2008 i gobiernu kier a subi e preis ku 35%.
Asuntu di preis di pan ta kapitulo aparte pasobra mester investigá kiko ta e tipo di pan mas komun, sea pan di awa of pan di lechi pasobra e ta hasi diferensia pa e panadero su margen di ganashi.
Pero sí loke mester ta hasi ta mantene produkto lokal pasobra si bai importa tur kos, e tin su risiko mará na preis di webu i pan i komestibel en general.