Temor pa Monkeypox no mester kita focus riba Covid-19

WILLEMSTAD – E temor ku aki i aya ta surgi den komunidat relashoná ku posibel di Monkeypox, no mester kita e focus riba kombatimentu di Covid-19. Asina dòkter Ashley Duits a bisa NOBO awe mainta. Ofisialmente gobièrnu mes a partisipá ku no tin motibu pa pániko i ku e ta bezig ta vigilá e desaroyonan internashonal di aserka.
No opstante e partisipashon aki, a surgi rumornan awe mainta di un posibel kaso di Monkeypox na Kòrsou.
Den kombersashon ku NOBO, dokter Duits a rechasá kategorikamente ku tin e males a yega Kòrsou. Duits a splika: ‘’Aktualmente na Merka tin mas o menos 4 kaso i na Hulanda a registrá 6 kaso te ainda’’. E informashon aki no ta motibu pa na Kòrsou, nos drenta hansha. Ademas, asina Duits a sigi bisa, Monkeypox ta plama hopi ekstremadamente rápido. ‘’No drenta pániko pero keda alerta’.

COVID-19
Loke ku sí ta eksigi mas atenshon ta e desaroyonan internashonal di Covid-19, kaminda ku a surgi algun variante nobo. Dokter Ashley Duits a menshon entre otro e variantenan B.A2. Na Portugal por ehempel tin37 porshento di kaso di hendenan infektá ta drenta hospital.
Esaki ta ilustra e importansia pa keda alerta i bakuna. Duits ta satisfecho pe hecho ku hendenan ta keda pasa nan ripitishon di bakuna i ku e bishita na kasnan di Kuido ta bai hopi bon. Ta trata dje trayekto pa bai tuma e bakuna.
Mientrastantu e sifra di mortalidat serka nos tambe ta stabil, loke ta un punto positivo, dokter Duits, ta remarká.