Te’i konstrui un Parke Eko-Industrial na parti wèst di tereno di refineria

WILLEMSTAD – Un Parke Eko-Industrial nobo, lo ta situa na e parti wèst di e tereno di refineria. E area kaminda e konstrukshon lo tuma lugá ta forma parti di terenonan ku no ta disponibel pa uso dor di e operadó nobo di refineria. Ayera Refineria di Kòrsou (RdK) i Curaçaose Wegenbouw Maatschappij (CWM) a firma e kontrato pa krea e infrastruktura nesesario pa realisá e Parke.
Ku e enkargo aki na CWM, RdK den kolaborashon ku CPA i CDM, ta dal e promé paso pa desaroyo di e area manera stipulá dor di Konseho di Minister den ‘Masterplan 2021 for the Port of Curaçao’, kual a keda aprobá anteriormente. Ku e aspirashon pa desaroyo duradero ekonómiko di e terenonan, lo enfoká pa banda di diversifikashon di e industria eksistente, tambe krea trabounan nobo. Konstrukshon di Parke Eko-Industrial Schottegat lo konsistí di tres fase. Pronto CWM lo kuminsá ku preparashonnan pa e promé fase riba e tereno den e area oeste di refineria. E tereno tin un grandura di apróksimadamente 65 hèktar i ta situá na rant di Schottegatweg-Noord, Nijlweg, refineria i awanan ku ta konektá na Schottegat.
Den e Parke Eko-Industrial lo tin espasio pa aktividatnan leve ku no ta kousa daño na nos medio ambiente i tampoko ta krea inkumbinensha. Pa proyektonan prosedente di e estudio ‘Living Lab Curaçao’ tin espasio disponibel. TNO ta realisá e estudionan aki den kolaborashon ku RdK, Aqualectra, Selikor, Curoil, CPA, ABC Busbedrijf, e ministerionan di Asuntunan General, Desaroyo Ekonómiko, Tráfiko, Transporte i Planifikashon Urbano i Salubridat, Medio Ambiente i Naturalesa, i banda di esakinan tambe algún kompania Hulandes. Living Lab ta tèst solushonnan inovativo ku mira riba e transishon den e area di energia i mobilidat. Un di e proyektonan ku lo realisá riba e Parke Eko-Industrial nobo ta un parke solar ku por generá 1MWp i ku lo keda konektá na un stashon kaminda bùsnan di ABC Busbedrijf por karga koriente, i tambe lo tin un reserva di bateria i un sistema pa maneho di energia. Ku e sistema aki lo krea un kadena duradero kompletu ku ta kuminsá ku produkshon di energia i ta kaba te na uso di esaki.
Alabes a tene kuenta ku posibel ekspanshon di e parke solar pa unu ku por generá 5 MWp na energia, pues esaki ta parti di desaroyonan ku ya a keda proponé. Den futuro, energia duradero prosedente for di e parke solar lo keda suministrá pa operashonnan industrial leve i aktividatnan inovativo.
Den e di dos i di tres fase di e proyekto total por ekspandé e parke solar aun más. Den tur aspekto ku tin relashon ku desaroyo di e terenonan ta tene kuenta ku tur esnan ku di un òf otro manera ta konektá òf por keda afektá. Entre otro pa e motibu aki lo soru pa posishoná sufisiente naturalesa kual lo no tin solamente un funshon estétiko, pero alabes lo fangu stòf i CO2 i alabes ta promové produkshon di oksígeno. Tambe tin atenshon pa e balornan kultural históriko den e area.