TARIFA DI DIESEL, ELEKTRISIDAT I AWA TA SUBI, GASOLIN TA OUMENTÁ LEVEMENTE

WILLEMSTAD – Entrante djamars 2 di ougùstùs 2022 e tarifa regulá di diesel ta subi na Kòrsou. E tarifa regulá di gasolin ta subi levemente.
Tambe e tarifa di elektrisidat i awa ta subi djaluna 1 di ougùstùs 2022. Esaki Bureau Telecommunicatie en Post (BT&P) ta partisipá den su komunikado mensual riba e partikularidat aki. BT&P ta supervisá e desaroyo di preis di produktonan petrolero i di utilidat. E oumento di tarifa pa elektrisidat i awa ta resultado di un promedio haltu di preis di kombustibel pa produkshon di elektrisidat respektivamente preis di elektrisidat haltu pa produkshon di awa, e produkshon miksto pronostiká i tambe e faktor di korekshon haltu pa elektrisidat i awa ofer di yüni 2022. Aprobashon i fihamentu BT&P ta asesorá Konseho di Minister (KdM) enkuanto e tarifanan nobo.
Solamente despues ku e KdM aprobá e propuesta, e Minister pa Desaroyo Ekonómiko, ku a la bes ta enkargá ku asuntunan di energia, ta fiha e tarifanan. Eseinan ta e tarifanan máksimo ku por usa un luna largu. Ku e prosedura akí, ku ta konsiderá faktornan internashonal i lokal, e supervisor BT&P ta vigilá e entrega di kombustibel, awa i elektrisidat na e poblashon lokal di forma independiente i transparente, pa esaki ta kontínuo i rasonabel. Por mira e ahustenan eksakto den e tarifanan riba www.btnp.org.