Tanker Ruso a yega Cuba ku 700.000 bari di petrolio

HABANA – Awe den oranan trempan di mainta un Tanker Ruso ku ta nabegá bou di e nòmber di NS Laguna karga ku 700.000 bari di petrolio a yega na e haf ku yama Antilla na Cuba.
E tanker karga ku petrolio di Rusia mester a ankra na e haf ku yama Matancero pero debí na lokual a pasa siman pasa ku werlek a dal un tanki grandi di kombustibel i sende esaki na kandela a pone ku mester a desviá e tanker aki pa haf ku yama Antilla.
Johnny Arellano periodista Cubano a pone riba su kuenta di Twitter ku e kargamentu di 700.000 bari di petrolio ku a yega den e tanker NS Laguna a trese Cuba tin un balor di $70 mion.
E tanker NS Laguna ta nabegá bou di bandera di Liberia pero ku tin kustumber di transportá petrolio pa Cuba i Nicaragua.
Miguel Díaz Canel presidente Cuba a gradisí Vladimir Putin pa e reakshon direkto na momentu ku nan tabata den nesesidat pa e petrolio despues ku e tankinan na e refineria Matancero a pega na kandela.