Ta kiko parlamentarionan a bai hasi Ulanda anto?

WILLEMSTAD. E reunion ku a tuma luga den kuadro di e reunionnan bi-anual entre partnernan den Reino apenas a pasa su promé dia di supuesto deliberashon ku Ulanda a resulta den un blamage pa Kòrsou for di momento ku e lider di delegashon di MFK, Thodé, a tene un diskurso ku si ela usa e idioma di Swahili, e lo a hasi mihó papel.
For di momento ku Thodé a kuminsa papia, sin por yuda nos a pensa riba difuntu Doktoor da Costa Gomez kende a presta pa tene un diskurso di komo 4 ora largu den nos parlamento di aquel entonces komo arma politiko pa desorientá su kontrinkantenan politiko den parlamento.
Esei mes tabata un barbaridat insólito pe tempu aya pero sikiera e ilustre politiko a hasi alarde di su dominio di palabrareria pa ridikulisá su rivalnan den politika kendenan no tabata analfabetiko den e materia pero mester rekonosé ku Doktoor a inventá un arma ku nan mester a rekonosé komo original i difisil pa imitá.
(Mester nota sí ku e tempu ei tabata pèrmiti pa dal bitter den parlamento i mas e alkohol tabata kore, mas lòs e lenganan tabata bira).
Frakshon di Democraat komo e rival historiko di Nashonal i COP (partido di ulandesnan den enseñansa i employé na Isla) a kai grandiosamente den e trampa di Doktoor.
Komo kontrinkante di debate nan a laga un miembro ku pasobra e tabata selador ku rango di referendaris loke ta nifiká ku e mester tabata sa lesa i skirbi, pa e surpasá Doktoor ku un diskurso mas largu. Ora ku e kronómetro a mustra ku ela surpasá durashon dje diskurso di Doktoor i a entrega palabra na presidente di parlamento, a toka na Doktoor pa replika i ela hasi esei ku e frase historiko pa eternidat: “Abrir la boca no es hablar”. Einan tur diskushon a kaba. Esnan ku no ta kere ku esaki tambe ta forma parti di nos folklor politiko, nos ta rekomendá nan buska den archivo di parlamento di tempu ku tabata traha minutas dje reunionnan nèchi imprimi na Curacaosche Courant di aquel entonces.
Honor a la verdad nos mester atmiti ku e loke nos tabata pa inmortalisa ku nos pèn awe a desviá ku e tema mes ku nos kier a bòrda riba dje ku te diskurso di e lider di frakshon di MFK, Thodé, i lamentablemente di henter e delegashon di Kòrsou lo haña un lugá aparte den e edishon di awe.