Ta ki falta di respèt esaki ta: Di dia kla kontrabandistanan kier a hinka 2900 kilo di droga den nos pais

WILLEMSTAD. Un pregunta en general ku redakshon di NOBO ta hasi: ta pa ken e 2900 kilo di droga ku Zr.Ms. Groningen i Wardakosta a kapturá antayera mainta riba laman dilanti nos kostanan?
Ku un kaptura rekòrt di droga ayera mainta tempran di dia 10 di ougùstùs Zr.Ms. Groningen ku e temporada aki ta nabegando pa Wardakosta Karibe Hulandes a detektá un go-fast riba indikashon di Sentro di Operashon Marítimo (MOC) di Wardakosta.
A lansa e botonan rápido di detekshon (FRISC) di Zr.Ms. Groningen pa stòp e boto sospechoso mientras ku e sospechosonan a tira tur kontrabanda den laman.
Unabes ku e FRISCnan tabata den banda di e boto, a duna un señal pa stòp i e sospechosonan a entregá nan mes.
Seguidamente a saka e paketenan ku mas o ménos 550 kilo, di kual 100 kilo di mariwana i 450 di kokaína seguidamente for di laman.
MAS BOTO SOSPECHOSO.
Na final di e akshon den oranan di mainta, Sentro di Operashon Marítimo di Wardakosta a mira un boto sospechoso mas. E biaha aki tabata trata di dos boto sospechoso.
Zr.Ms. Groningen mes ora a nabegá bai na e lokalidat di e botonan sospechoso. Ambos boto sospechoso tabata banda di otro den laman, pa asina nan por a yena gasolin.
Un di e go-fast nan tabata kargá ku barí ku gasolin na bordo.
Mesora ku tripulantenan di e botonan sospechoso a ripará ku e barku di marina tabata nabegá bin riba nan, nan a tira tur kontrabanda den un boto i a purba hui bai ku e otro boto.
A lansa e botonan FRISC rápido di Zr.Ms. Groningen i a kuminsá ku un persekushon. Zr.Ms. Groningen seguidamente a tuma e boto ku a keda atras ku e kontrabanda den su poder. E sospechosonan ku a hui no a reakshoná riba señalnan pa stòp ni tirunan di atvertensha. Despues di esaki e motor di e go-fast a keda desaktivá i e go-fast a stòp den laman.
E 8 sospechosonan a keda detené i trasladá riba e barku di Marina Zr.Ms. Groningen. E karga ku a keda atras di kontrabanda a resultá di tabata mas o menos 2300 kilo kokaína.
En korto, djarason 10 di ougùstùs un biaha mas tabata un dia eksitoso. Ku un biaha mas un rekert nobo. Zr.Ms. Groningen, nabegando pa Wardakosta Karibe Hulandes.
Riba e dia ei a detené un total di 13 sospechoso i tuma na bordo mas o menos 2900 kilo di droga di kontrabanda.
E kontrabanda i e sospechosonan a keda entregá na Kuerpo Polisial di Karibe Hulandes (KPCN) na Boneiru (pa evitá ku lo hòrta den den warda di polis manera a yega di pasa ku 600 kilo kaba den pasado??)
E total na kontrabanda konfiská pa Wardakosta Karibe Hulandes ta yega awor un total di mas o menos 8.500 kilo.
Djis un opservashon: parse ku e kontrabandistanan di droga a pèrdè tur respèt pa nos outoridatnan i di dia kla kasi a roga pa kapturá nan ku e droga. Solamente tabata falta ku nan a tira bèk riba e tripulantenan dje barku ulandes.