Ta basta ku Politikeria! Ta ora pa traha pa Boneiru

Kralendijk–Segun Jefrey Levenstone eksponente di Union Patriotiko Boneriano UPB ta bisa, Ultimamente nos a ripara ku Konseho Insular, pa ta mas eksakto konsehal Daisy Coffie, a lanta foi soño i a pone nos líder politiko Pablo James Kroon den su mira komo su “Punching Bag”. Na bon papiamentu bisá, komo su feila. Konsehal Daisy Coffie riba mandato di su konseheronan a tuma riba dje pa tur siman saka otro insinuashon kontra líder di UPB, James Kroon. E siman aki konsehal Coffie a start ku e topiko di Cuba Compagnie. E meta tras di esaki ta unu politiko i bastante fasil pa bo mira. E ta pa elimina James Kroon politikamente den su bario for di unda no solamente e ta procede, pero kaminda e ta biba realmente.
Pa refreskamá mente di konsehal Coffie i tur ku ke lesa e komunikado aki. T’asina ku 9 aña pasá ora ku gobiernu di UPB ku Sr. Kroon komo punto di lansa a tuma e desishon pa traha e deal ku konsehal Coffie ta yama deal lukrativo, ku e doñonan original di Cuba Compagnie, nos tabata testigu di un edifisio den hopi mal estado. Un edifisio ku tabata representa un berguensa pa nos sentro di suidat i kaminda hobenan di sexo feminino tabata wordu molestia konstantemente. UPB e tempo ei a disidi na será un kontrato ku Cuba Compagnie, ku ta ensera ku pa un periodo di 10 anja, e kompañía ta hanja uso di e edifisio. Bou di e kondishon ku nan lo drecha i eksploita esaki komo restaurant. Durante 10 aña kontra un preis simboliko. Esaki a tuma lugar i nos por informa pueblo di Boneiru ku e doñonan di Cuba Compagnie, a inverti 500.000 USD (mei mion doller merikano) den e edifisio, e kompania ta emplea 30 persona, e kompanía ta paga entre 20.000 USD – 30.000USD na servisio di impuesto pa luna i komo unu di e pokonan e kompania aki ta paga prekario, na balor di 4000 USD tur anja. Si nos ke bai mas leu, nos por komenta kon e desishon aki di UPB a kambia kara i ambiente di sentro di Kralendijk, di forma barbaro. Ta esaki konsehal Coffie ta jama deal lukrativo? Dunando un kompania e opshon pa inverti 500.000 i sor u pa saka e sen aki bek i hasi ganashi den 10 aña di tempo. Sin konta sen ku a paga na impuesto i prekario. Insinuando ku ta algu robes James Kroon i UPB a hasi. Kom nou. Na bon Hulandes, tin un dicho ku ta bisa; Spijkers op laag water zoeken. E ta nifika, ku hende ta buska jen di kos sin pia sin kabes, ku no ta kuadra i ta keda zeur riba nan.
Nos ke pidi konsehal Coffie pa tuma na konsiderashon, nos proposishon pa ban traha pa Boneiru. Nos ta na kaminda pa sali for di un pandemia hororoso. Un pandemia ku a kosta bida di hende, un pandemia ku a pone nos manera di biba i sosialisa bou di preshon enorme i un pandemia ku a destrosa nos ekonomia. I den e situashon aki, e uniko kos ku un representante di pueblo por hasi, ta lanta falsu testimonio kontra di James Kroon?
Na e momentunan aki, pueblo di Boneiru ta eksigi di su lidernan, pa nan pone tur nan enfoke riba rekuperashon di nos ekonomia i nos estilo di bida. Pueblo no ta sinta warda riba insulto, kalumia geranan personal ku metanan politiko. Pues e jamada ta un biaha mas, pa nos ban duna kontenido na tur e palabranan bunita di trabou i unión ku a wordu papia durante e kasi dos añanan ku ta tras di lomba. Awor te ora pa mustra ku realmente nos meta i nos enfoke ta Boneiru pariba, Boneiru pabou, Boneiru den Nort i Boneiru den suit.