SVB no tin nada di haber ku regla ku dokternan mester baha ku penshun

WILLEMSTAD. Kontrali na e impreshon ku por ta reina aki i aya ku ta SVB ta e entidat malvado ku ta obligá dokternan di kas pa baha ku penshun ora nan kumpli 65 aña, nada ta mas leu for di bèrda ku e pensamentu aki.
Tempu ku gobiernu di Kòrsou a introdusi e regla i a priminti e dokternan ku lo bin un periodo di transishon pa nan prepara nan mes pa baha ku 65 aña, SVB a mustra nan riba artikulo 1, entonashon 1 párafo 1 sub c. dje dekreto ku ta bisa: no ta sera kontrat ku esnan ku a yega edat di haña Penshun di Behes entrante 1 yanuari 2020.
I si e dokter no a kumpli 65 aña ainda por sera kontrat kune pero e kontrat ta kaduka asina e yega e edat di 65 aña.
Sobrá ta historia; spesialistanan a disidi di demanda gobiernu pero despues a revoká e demanda i dokternan di kas tambe a demanda gobiernu pero nan tambe a hala nan demanda aden ora gobiernu a priminti ku lo bin periodo di transishon.
Korte a sentensia ku ora introdusi un kambio asina mester tin un periodo di transishon durante kual e dokternan por prepara nan mes pa nan kondishon di bida nobo.
Dikon gobiernu a pèrdè e kaso?
Gobiernu a introdusi un areglo di transishon ku ta ofresé dispensashon dje regla si tin skarsedat di dokter di kas.
Ademas nan a mustra ku SVB ta paga nan 90% di nan honorario i gobiernu a traha e dekreto sin konsulta ku nan.
Esaki ta perhudika e dokternan grandemente.