Sùr Norma Angel ta Muhé Ekselente 2022

WILLEMSTAD – Sùr Norma Angel PhD MM a keda rekonosé durante di e di 19 Konferensia di Liderazgo Femenino komo Muhé Ekselente pa su logronan profeshonal i internashonal i su konstante keda kòrda di kon nos tin di hasi un kambio den mundu.
Nasé den bario di Marie Pompoen na Kòrsou el a garantisá su mes pa no lubidá su rais na su isla.
Na unda ku e ta trahando na mundu e tin su bandera chikí di Kòrsou pasobra hopi biaha e tin di splika na unda e pais ku e ta parti di dje ta keda na mundu.
El a bai Ulanda pa studia baila balèt pero a kambia pa trabou sosial ora ku el a realisá ku e ke hasi mas pa humanidat.
Ku su doktorado den sikologia sosial e ta biaha rònt mundu hasiendo trabou di diversidat, komo mediadó den situashon internashonal na nivel haltu i ta logra na trese hende huntu den lugánan kaminda na promé instansia no tabata parse posibel.
Su base ta na Merka pero e tin trabou permanente na Kenia i na Tanzania kaminda e ta pasa gran parti di aña.
Durante di henter su karera el a keda pone atenshon na hóbennan i a diseñá algun proyekto interesante pa mucha muhénan hóben ku ta biba den situashonnan retá, programanan ku e ta dispuesto pa kompartí si tin interes.

Komo sùr katóliko romano su énfasis ta keda riba kreamentu di un mihó mundu ku hèrmèntnan disponibel kaminda ku tin di hasi un diferensia i ora ku mester.
‘Mi gusta loke mi ta hasi espesialmente ora mi por mira un bon kambio’ asina Muhé Ekselente 2022 sùr Norma Angel PhD, MM a bisa.
I mester bisa tambe ku e Muhé Ekselente 2022 ta for di promé momentu konsehero di e Konferensia Anual di Liderazgo Femenino na Kòrsou na kual e no por tabata presente e aña aki.
Pa keda rekonosé komo un Muhé Ekselente, un ehèmpel pa muhénan hóben, e hende muhé aki mester ta riba 60 aña di edat, e mester ta di den Karibe, i trabou ke el a hasi durante di su karera mester ta benefisiá otro hende muhé.