Sugerensia di minister di Finansa lo krea situashonnan peligroso

WILLEMSTAD. E kambio minister di Finansa, Javier Silvania, a lansa siman pasá den parlamento por okashoná un situashon indeseabel i hopi peligroso den nos komunidat.
Ya kaba un partido di oposishon a denunsiá esaki mustrando riba e peliger ta kiko lo por pasa si e persona ku fia su kuenta, kuminsá kobra pa esaki, asta keda sin traspasá e fondonan?
Niun pais ku ta respetá su mes, ta eksigí un siudadano pa bai fia un kuenta di banko, komo maneho i sin krea un opshon viabel pa tur hende.
Ademas, enkurashá hende pa risibí sèn riba kuenta di un terser, ta trese un riesgo altísimo pa labamentu di plaka (money laundering).
Ta iresponsabel pa un minister di finansa enkargá ku salbaguardia nos leinan lokal i tratádonan internashonal kontra labamentu di plaka, hustamente ta esun ku ta promové e praktikanan aki.
A base di e kontestanan di minister a keda demostrá ku e desishon pa eliminá kesh ta un desishon parotin i mal prepará.
Landsontvanger no tabatin sufisiente tempu pa hasi e kambionan nesesario i ta presentá un maneho robes i peligroso.
Plaka kèsh te keda un forma di transakshon pago i kobransa legal i no por eskluí niun hende si nan kier risibí nan restitushon di forma kèsh.
Frakshon di PAR a pidi Gobièrnu pa no perhudiká siudadanonan i nos Pais mas pa motibu di terkedat di e minister.