Steven Martina a baha komo parlamentario i lider di MAN

WILLEMSTAD – E aktual lider di Partido MAN, Steven Martina, despues di a entregá un karta na Direktiva di Partido MAN, den kua el a informá direktiva ku e ta pone su puesto di lider polítiko na disposishon di partido, a anunsiá esaki tambe den un reunion di Konseho di Partido ku a tuma lugá ayera nochi 25 di Ougùstùs 2022 na Sede di Partido MAN.
Alabes Sr. Martina a informá direktiva di partido ku e lo renunsiá komo parlamentario pa Partido MAN. Direktiva a trata e karta di Sr. Martina den un reunion di Direktiva. Direktiva na su turno a hasi un apelashon riba Sr. Martina pa sigui ehersé e trabou di Lider Polítiko te na momento ku kongreso skohe un Lider Polítiko nobo. Un petishon di kua Sr. Martina a bai di akuerdo kuné.
Pa loke ta trata e desishon di Sr. Martina, pa renunsiá komo parlamentario, a yega na un akuerdo ku despues di konsulta ku Direktiva i Frakshon di MAN den Parlamento, lo anunsiá un fecha.
Den e reunion di Direktiva a tuma e desishon pa kuminsá e proseso pa yega na un Lider Polítiko nobo manera ta deskribí den reglamentonan di Partido MAN.
Direktiva na nòmber di Partido MAN a gradisí Sr. Martina pa su trabou balioso desplegá i e kontribushon ku el a duna na nos pais den e funshonnan komo Minister i Parlamentario pa Partido MAN.
Ivan Steve “Steven” Martina (61) a nase na Kòrsou i tabata minister di Desaroyo Ekonomiko den gabinete Rhuggenaath entre 22 di mei 2020 i promé ku esei entre 2 di yuni 2017 te 21 di februari 2019.
Den gabinete Daniel Hodge tambe e tabata minister di Desaroyo Ekonomiko di 31 di desèmber te 7 di yuni 2013.
Steven Martina su tata ta Don Martina, èks promé minister di Antia i a studia na Universidat di Tilburg i tin doktorado di Universidat di Delft.
Entre 1999 i 2006 e tabata direktor di Aqualectra i despues a bira presidente,ora ku su tata a bandoná MAN na 2011 pero a retorná su kuna politiko na 2016.
Dia 16 di mei 2020 ela remplasá Hensley Koeiman komo lider politiko di MAN.
E spekulashon ku a sirkula ta ku e parlamentario Giselle MacWilliam lo asumi e funshon di lider dje partido.