STBNO a konstata ku: Nombramentu di direktor Tom Domhof na Giro (nobo) a bai intransparente

WILLEMSTAD. E nombramentu di e promé direktor na Giro nobo stail di Incasso Buro, no a bai masha transparente.
Esei por destilá for di un karta ku STBNO a manda pa gobiernu na momento ku nan a keda konfrontá ku resultado di búskeda di un segundo direktor pa Giro Settlement Holding ku tin ku funshoná komo ‘stofzuiger’ pa kobra tur e hendenan ku debe mionario na Giro pero ku no ta pagando.
STBNO te órgano ku ta ‘screen’ kandidatonan pa funshonnan gerensial i direktiva di empresanan di gobiernu, i nan a haña nan konfrontá ku e hecho ku e nombramentu di Domhof no a pasa via nan pa evaluashon.
Den e kaso aki Minister di Finansa mes a hasi uso di su kompetensia pa nombra e promé di e dos direktornan na Giro Settlement Holding i a nombra señor Domhof.
Luna pasá STBNO a haña un karta sin algun motivashon ni splikashon dje desishon di Konseho di Minister pa nan duna nan opinion si tin opheshon kontra nombramentu dje segundo direktor.
Den e kaso aki ta Banko Sentral a buska e kandidato i a manda bisa ku nan ta di akuerdo ku e segundo direktor su nombramentu pasobra su papelnan ta ekselente.
STBNO lo mester duna nan rekomendashon faltando sierto informashon i dokumento ku e minister no a manda pa nan.
No tin algun indikashon ku a tene solisitashon habrí i transparente ni si a selektá entre varios kandidato.
Di otro banda tin komprenshon ku den kaso di nombramentu dje promé direktor tabatin urgensia despues ku a lanta e “Giro nobo c.q. Incasso Buro”.
Esaki siendo ku for di aña pasá desèmber a lanta e Giro Settlement Holding i tabatin seis luna durante kual por a rekluta i selekta un direktor.

Pa tin nan archivo riba e kaso aki na òrdu ounke ya ta lat pa hasi algun kambio, STBNO a pidi gobiernu pa maske ta lat, manda e dokumentashon splikando dikon a desviá for di e prosedura normal i no a tene un reklutashon i selekshon transparente.