Sra. Margareta Maria Douglas-Dal a kumpli 100 aña

Willemstad – Djaluna Seru Fortuna tabata di fiesta ya ku Mai Yeta a kumpli e bunita edat di 100 aña. Mai Yeta ta un persona hopi konosí den Seru Fortuna kaminda semper e a bida. Dios a bendishoná Ma Yeta ku 8 yu di kual 7 ta hòmber I unu ta hende muhé.

Huntu ku su yunan Mai Yeta tin 14 nietu, 16 bisañetu i tambe 1 tuma nietu. E dushi ta ku tur e famia grandi aki ta na bida I por a selebrá ku Mai Yeta e dia special aki. Parti mainta Pastor Morrison a bin hasi un Santu Sakrifisio di misa pa Mai Yeta I anochi, spesialmente famia I bisiñanan a bini pa pasa un ratu kontentu ku Mai Yeta.

Maske e salu no ta manera ántes, Mai Yeta ta skucha bon i bo mester a mira kon kontentu e tabata kanta ora tabata kanta Happy Birthday pe. Sin duda, Mai Yeta a gosa di su dia I e a hari masha ora un hende a bisé ku nan ta spera ku e lo por bai sigur un 10 aña mas.

Mai Yeta ta konta su yunan ku awor aki nan ta hopi bon. Mai Yeta tabata tin famia ta biba na Santa Rosa I ora mester a bi-shita e famianan aki ta riba buriku mester a subi pa bai Santa Rosa. Kasi dos ora mester a kore riba buriku pa yega Santa Rosa, kos ku awendia den 10 pa 15 minüt bo ta yega.

Den famia Mai Yeta a pone un record ya ku e ta úniko ku a yega e edat respetá di 100 aña. Natural ta di spera ku mas famia igualá Mai Yeta.

Mai Yeta masha pabien I sigui gosa di e felisidat ku nos bon Dios a duna bo pa yega e edat bunita aki den kompania di bo famia grandi ku ta stima bo masha hopi mes.
Riba e potrètnan por mira algu di e selebrashon di Mai Yega su 100 kumpleaño.