Sr. Richard Leito, eks dirigente di NAOC: “Nan a pidi nos pa keda rustig”…

• Sr. Richard Leito tabata visepresidente di Komité Olímpiko Antiano i man drechi di Sr. Junior Millerson (dfm) kendenan a biaha pa Suisa pa kombersá ku dirigentenan di Komité Olímpiko Internashonal pa mira ku nos por mantené e “charter” Olímpiko despues ku na 2010 nos a bira Pais Outónomo den Reino.
Nan a bisa nos ku básikamente nos no tin niun derecho mas, pero ku nos keda “rustig” i bai trankil lo mira kon ta wanta nos aden, siendo ku semper nos tabata aden.
Sinembargo aki na Kòrsou algun dirigente a tuma e desishon ku ta bai un lucha vs Komité Olímpiko Internashonal gastando masha hopi plaka, siendo ku nos no tabatin niun oportunidat.
“Nos a bai tras di hendenan ku ta grita duru.
Bo no ta gana Komité Olímpiko Internashonal nunka.
Nos no mester a hasi e kos ei hamas”, Sr. Richard Leito a deklará.
Kla e ta kòrda kon a tilda Sr. Junior Millerson (dfm) di ta kontra di Kòrsou.
“Ami a bisa Junior, ku ami lo no a drenta “Hall of Fame”.
E kos a hasi Junior hopi doló, paso a tilde di ta kontra Kòrsou”, Richard Leito a añadí den “Cuando Yo, Era Yo” den Deporte Hoyer djarason último.