Sr. Maurits, “Mau” Rosalia, dirigente di Victory Boys: “Victory Boys ta “Full” kontra violensia riba tereno”… I ta pidi diskulpa…

Deporte 5 Star a kombersá ampliamente ku Sr. Maurits Rosalia, konosí komo “Mau” o “Juni” kende ta dirigente di e tim di Pariba ku ta Victory Boys.
El a papia na nòmber di e direktiva di Victory Boys pa duna nan banda di medaya riba e suseso lamentabel di djasabra último.
Sr. Rosalia a bisa bon kla ku e Organisashon di Victory Boys ta “full” kontra di violensia riba tereno.
“Nos ta traha tur dia pa motivá e hungadónan pa ta deportivo”, e ta bisa.
E trabou ei a pone ku último añanan e onsena a bin ta haña notablemente ménos tarheta kòrá.
Victory Boys a trata di mantené e kondukta deportivo aki tambe hungando kontra ekiponan ku ta super agresivo.
Segun e dirigente di Victory Boys nan futbolistanan ta sufri hopi leshon pa wega duru di atversario, pero tambe pa atakenan direkto.
Segun Sr. Rosalia nan ta hasiendo hopi esfuerso, i a nota tambe resultado.
Lamentablemente e direktiva no tin kontròl kompleto riba e fanatikada.
E dirigente ta remarka ku djasabra ei nan hungadónan a risibí hopi “foul” ku no a wòrdu kastigá pa ofisialnan di wega.
Nan ta asumí ku esei lo por ta motibu di fayo di madures dje kuerpo ku a dirigí e wega.
Segun e dirigente kosnan a sali for di man despues ku a basha un futbolista di nan abou, i despues trapa riba dje.
E hungadó ku a hasi sumes kulpabel pa e akto ei a haña un karchi hel, siendo ku tabata bisto ku e mester a haña tarheta kòrá.
Esei a lanta e sentimentu mesora,”Di kon e no i ami si”.
Despues a kai un èlebog den kara i un hungadó a pone ku otro hungadó a reakshoná robes.
E dirigente ta bisa ku e outor dje èlebog ta un hungadó ku a provoká for di tempran.
Esei a pone ku emoshon a subi tantu riba tereno komo den tribuna i kosnan a sali for di man kompletamente lokual Victory Boys ta lamentá.
Sr. Rosalia ta bisa ku Victory Boys ta e ekipo di speransa ku ta duna bataya i doló di kabes na tur otro ekipo. Na nòmber di su deportistanan, direktiva, téknikonan, sostenedó i fanátiko ta pidi diskulpa na amantenan di futbòl pa loke a sosodé djasabra último.