Spice Girls a inspirá Beyoncé

Durante un kombersashon via podcast Breaking Beauty, e diseñadó di moda Victoria Backham a duna di konosé ku e super strea Beyoncé tabata sa ku e sigui un karera musikal despues ku na hóben e la mira e grupo Spice Girls. Spice Girls a hasi nan debut na 1994, e temporada ei Beyoncé tabatin diestres aña. Na 2000 e grupo a stòp ku kantamentu I presentashon, pero a hasi dos ‘come-back’ na 2008 i na 2012 durante olimpiada na Inglatera.

“Mi a topa ku Beyoncé algun aña pasa I e la konta mi ku ta Spice Girls a inspir’é I perkurá pa e la tuma e desishon di sigui den músika I di ta orguyoso di tabata un mucha muhé. Si un persona manera Beyoncé, un ikono I un muhé fuerte bisabo ku su inspirashon tabata den Spice Girls ta un honor grandi”, asina e kasa di David Backham a konta.

Geraldine Halliwell, Melanie Chisholm, Victoria Adams Beckham, Melanie Brown i Emma Bunton,bou di e nòmbernan ‘Ginger Spice’, ‘Sporty Spice’, ‘Posh Spice’, ‘Scary Spice’ i ‘Baby Spice’ a forma parti di e grupo femenino ku hopi éksito den añanan nobenta.

Beyoncé a sigui krese den e industria di músika I ta aktualmente un di artistanan mas rekonosé.