Sorpresa históriko den mundial di Qatar: …”Batacaso !!!”… …Saudi Arabia a dal Argentina 2-1…

E selekshon di Saudi Arabia ku ta na di 51 lugá riba ranking mundial di FIFA a perkura pa tremendo sorpresa awe den e mundial di futbòl na Qatar ora ku nan a gana di Argentina ku skor di 2-1. Sin duda e resultado aki por wòrdu konsiderá komo un dje sorpresanan di mas grandi di mundial.
Esnan ku ta pusta plaka, si nan lo a pusta 1 euro riba Saudi Arabia, nan lo a gana 400 euro dje faborito grandi ei Argentina tabata.
E selekshon di Argentina a habri markadó na di 10 minüt pa medio di Lionel Messi.
Nan a ataka formalmente i ku poko mas suerte nan lo por tabata dilanti ku 3 o 4 gol. Sinembargo VAR i off-side a yuda Saudi Arabia ku na di 48 minüt ta empatá e wega mediante Saleh Al-Sheari, i 4 minüt despues tabata Salem Al-Dawsari ku ta hasi e wega 2-1 pa e selekshon di Arabia Saudita. 1 gol di Lionel Messi i 2 gol di Lautaro Martinez a wòrdu anulá. Saudi Arabia a keda lucha, ku un kiper ku a hasi tremendo trabou i basta suerte tambe pa finalmente gana 2-1 perkurando pa tremendo sorpresa.
· Argentina su siguiente wega lo ta kontra di Mexico dia 26 di novèmber próksimo pa 3or di atardi..
· Saudi Arabia ku a kue 3 punto ta topa ku Polonia tambe dia 26 di novèmber próksimo den Grupo C dje kompetensia.