Solushon pa problema di trahadónan di SOAW lo dura

WILLEMSTAD – Tin indikashon ku por lo pronto trahadónan di e departamentu di laboral di SOAW no ta regresá e ofisinanan di WTC. NOBO tin informashon ku e trahadónan no ta mashá interesá pa bai sinta traha na WTC, mientras ku no tin garantia shen porshento ku tur kos ta kla.
E trahadonan di departamentu di labor pa algun tempu kaba ta sinti efekto dje kondishon dje edifisio ku nan ta traha den dje, ta aden. E temperatura no ta bon i tambe nan ta konfronta algun otro problema. Ta trata di entre otro falta di sufisiente hende pa traha i tambe hèrmèntnan ku nan tin mester pa hasi nan trabou.
E trahadonan por sigi traha for di kas? Asina nos a puntra Gregory Wilson di ABVO. E sindikalista ta splika: Na Kòrsou, no konose e sistema pa hendenan traha na kas.
Den nos kondishonan laboral, nunka no a diskuti e tipo di senarionan aki ni tampoko no tin un areglo pa esaki.
Pues si un trahado mester traha na kas, kiko ta loke ku e dunadó di trabou mester tene kuenta kune pa e trabou ku e empleado mester hasi na kas, pero tambe kiko e doño di trabou tambe mester tene kuenta kune.
Gregory Wilson a bisa ku ora ku e situashon di Covid-19 a presenta, a akomodá i laga e trahadónan traha na kas, pero te ainda no tin nada reglá. Si na trabou tin un buro ku lus spesial, na kas un hende no tin esaki, pasobra no ta su sitio di trabou. Tin hende ku ta hasi sierto kos na kas, pero no ku nan ta den e situashon ideal. Ta dependé di e bon boluntat di hende kon ta atendé ku e situashon aki.
EHERSISIONAN INTENSIVO
Aktualmente gobièrnu ta hasi ehersisionan intensivo huntu ku doño dje edifisio na WTC, huntu ku Arbo i ADC i ta purba di hasi tur e ehersisionan ku ta nesesario pa e schimmel disparse por kompleto. Pero pa e schimmel disparse, tin mekanismonan ku mester instalá den e edifisio, ku for di tempu ku e edifisio ta eksisti, nunka no tabatei.
Ta hasiendo tramite pa den e sistema di aircondition instala e mekanismonan di kontrol i sirkulashon adekua di airu logra un Sistema safe pa salu dje trahadonan por traha. Banda di esei, ta trahando riba e dak tambe, pasobra e sealnan riba e dak a krak. Tambe ta adando e seguridat di prevenshon di kandela.
Tur e kosnan aki ta mara na tempu, Wilson ta splika.Entre otro tin piesa ku mester manda buska i ku mester instala despues.
Wilson: E pregunta ta, si konstata adelanto den e trabounan ku ta tuma luga na WTC, si esaki ta duna sufisiente garantia di seguridat pa e trahadonan bai traha den e edifisio.
E problemanan aki tei, pasobra basikamente gobièrnu ta hür edifisio serka komersiantenan ku ta ofrese espasio pa hür. Despues por resulta ku e edifisionan no ta adekua, apesar ku ta trata di un edifisio grandi i moderno.
‘’ABVO ta pidi pueblo komprenshon ku tin mester di su servisionan. E aña ku a pasa, e trahadónan a duna di nan banda, traha den kondishonnan ku no ta faborabel. Pero ora ku mester duna servisio, nan mes tambe mester ta den e kondishon korekto’’.