SLM ta reanudá su buelonan pa Amsterdam ku otro avion

SCHIPHOL – Surinam Airways (SLM) ayera mester a reanuda e buelonan entre Paramaribo i Amsterdam. Djamars anochi e kompania a informa ku e reanudashon ta tuma luga un dia mas lat.
E kompania ku ta ehekutá e buelonan ta GullivAir di Bulgaria i no Airhub, manera a anunsiá anteriormente. SLM ta bisa den un deklarashon ku debi na trabounan di mantenshon tekniko na e avion di Airhub Airlines, e avion no ta disponibel. “Pa garantisa e operashon’, Surinam Airways a buska un otro avion ACMI-carrier (wetlease, inkluso personal di cockpit), ku ta e GullivAir di Bulgaria , ku ta disponé di dos Airbus A330.
SLM ta menshoná un kapasidat di 326 stul, loke ta nifiká ku ta trata di e avion di GullivAir ku registrashon LZ-ONE, ku tin solamente stulnan di economy clas.
SLM ta bisa ku di e manera aki, e pasaheronan ku a keda tras por haña buelo.

Marduga
E buelo mester a sali 5or di mainta. Pasaheronan por a kuminsa chek in for di marduga na Johan Adolf Pengel International Airport na Surnam.
No ta konosi ki dia e buelo ta regresá. Originalmente e intenshon ta pa SLM bula tres biaha pa siman, entre Surnam i Hulanda.
Debi na problemanan finansiero for di komienso dje luna aki, Surinam Airways no a bula mas riba e uniko ruta ku e tin ainda; Paramaribo-Amsterdam.