SLM ta kanselá su buelonan pa Trinidad i Tobago

PARAMARIBO — Despues di kasi 30 aña di a bula e ruta Paramaribo-Trinidad, Surinam Airways (SLM) ta kanselá su buelonan entrante mesora pa motibu ku e ruta no ta produktivo mas.
Kasi 30 aña SLM a bula e ruta for di Paramaribo pa Korsou i Aruba via Trinidad pero despoues di dékada di mal maneho, e final a yega.
Bosero dje kompania no a informa pa ki motibu nan ta para e buelonan mesora sino ku nan lo revisa nan rutanan pa salba loke nan por salba.
Tabata den e korant mas antiguo di Trinidad, “Trinidad & Tobago Guardian” ku un bosero di SLM a konfirma ku nan ta para e buelonan inmediatamente.
Biaheronan ku tin reservashon ku SLM lo por hasi nan buelo ku Caribbean Airlines Limited (CAL) ku kual SLM tin akuerdo kaba.
Djarason ultimo minister di Eksterior, Albert Ramdin a deklará ku SLM tin potensial pa ta un kompania ku ta gana plaka a base di su reputashon i fama internashonal.
Pero dékadanan di mal maneho a kobra preis i mester resolvé e problemanan finansiero promé i tin un trayekto pa sana e kompania.
Si no tabatin e perspektiva aki lo a sera e kompania mesora pero e kompania di estado tin bida i nan lo purba pa sana e kompania. Presidente Santokhi tambe a deklará ku SLM ta aun kompania importante di estado i ku no mester laga e kompania bati bankarota.
Den seno di SLM ta reina masha pena pa e hecho ku nan tin ku tuma despedida di nan kolaboradornan na Trinidad i ku nan pasaheronan pasobra nan tin kasi 30 aña ta traha ku nan. Sinembargo e kompania ta spera ku despues di reorganisa e rutanan, nan lo por reanuda nan buelo pa Trinidad.