SLM a kanselá tur vuelo pa tur destino direpente!

WILLEMSTAD. Prinsipio di siman pasá e notisia a sirkulá èkstra ofisialmente ku SLM a kanselá su vuelonan pa Surnam per dirèkt despues di 30 aña, djarason e kompania a emiti un deklarashon despues ku e sòpi di pinda a bomba.
Despues di 30 aña di servisio SLM a para su vuelonan pa Port of Spain, Trinidad, i Belém na Brasil i ku nan ta revisando i model di servisio ku nan ke presta pa mira si e kompania tin futuro.
Palabra masha bunita a kai den sentido di tabata duru pa stòp di bula pe destinonan aki.
A sigi palabranan hipókrita ku nan ta gradesido na nan kolaboradornan lokal i agentenan di biahe.
Palabranan bunita pero e reakshon publiko no a tarda pa kalifiká e desishon aki komo kos di shouru.
E aktuashon traishonero repentino aki a pone ku pasaheronan di SLM a keda pegá na Trinidad i Belem.
No ta konosí kiko pasaheronan aki ta bai hasi pasobra nan lo mester hasi gastu èkstra pa retorná nan pais.
I komo insulto riba e daño ku nan a kousa, SLM a laga sa ku nan tin speransa ku nan por reanudá e vuelonan.
Entrante 1 yuni proksimo lo tin vuelo riba djarason i djadumingu riba e ruta pa Korsou.
E problema ta ku e duda ta enorme si SLM ta den kondishon por garantisá e lema “flying on trusted wings”…..

SLM mester a anula vuelo PY631 di Paramaribo pa Korsou i Aruba pasobra e avion ku nan a kontrata dje kompania spañó Aura no tin dokumentashon aeronoutiko na òrdu.