Skuchami i Brasami ta risibí bishita di Minister Pietersz- Janga

Willemstad – Resientemente Minister di Salú, Medio Ambiente i Naturalesa dr. Dorothy Pietersz- Janga, a bishitá instansianan aktivo den e sektor di salú mental. Primeramente Minister a bishitá Skuchami ku ta keda na Montaña i despues Brasami ku awendia e departamentu di rehabilitashon ta ubiká riba tereno di Klinika Capriles.

Na yegada di Minister Pietersz- Janga na Skuchami Minister a keda risibí pa miembronan di tim di maneho i miembronan di direktiva. Despues di a sera konosí i un resepshon kòrtiku, Minister haña un rekorido den edifisio.

Despues Minister a bishitá Brasami kaminda Minister a keda risibí pa e direktor i miembronan di direktiva. Durante un rekorido a informá Minister di e retonan ku personal ta konfrontá den nan trabou pero tambe puntonan di atenshon relashoná ku alohamentu i mantenshon. Na Brasami Minister por a kombersá tambe ku algun kliente i tuma nota di obra di man ku nan ta elaborá.

Durante e bishitanan aki Minister a keda akompañá pa su kolaboradornan señora Cheryl Ramirez, señora Lizaima Da Costa Gomez i señor Aubry Janga. Di Ministerio di GMN tabata presente: direktor di sektor di salú Melissa Arias i Beulah Mersera di departamentu di maneho.