Skol AGO G.E.E.Kroon ta orguyoso di su alumno Sebatian Ramirez Russo

WILLEMSTAD – Resientemente Skol AGO G.E.E. Kroon a risibí alumno Sebastian Ramirez Russo, Sebastian ta un di e hóbennan ku a representá país Kòrsou na nivel internashonal den ámbito deportivo.
Sebastian ta pertenesé na e equipo Little League Junior. Su selekshon Junior a gana na Puerto Rico i a sali kampion Latinoamericano. Resientemente a biaha na Michigan USA kaminda a keda posishoná na di tres lugá.
Nos di Skol AGO G.E.E Kroon ta sumamente orguyoso di e triunfo aki. Komo skol sekundario dirigí riba fishi ta sostené tur alumno ku ta destaká den diferente talento i disiplina.

Den un apertura di día, reuní bou di patio kubrí di skol, tur alumno, dosente huntu ku mayor di Sebastian, a risibí nos kampion na un manera kaluroso.

HUNTU nos a para ketu riba dos palabra klave: DISIPLINA I RESPET.
Disiplina i rèspèt ta dos norma ku tur siudadano por siña di nos heroenan deportivo. Usando e dos palabranan aki, dirigente di skol Sr. Van Putten a motivá un i tur pa imitá alumno Sebastian. E importansha di sigui praktiká deporte ku ta un di e materianan ku mas ta yuda den e parti di desaroyo físiko i mental.
Pa finalisá e enkuentro positivo aki, skol a entregá alumno Sebastian un kadoubòn i un boton spesial, komo muestra di gratitut pa loke huntu ku su tim el a hasi representando nos pais Kòrsou. E boton spesial aki tin e logo di skol indikando ku: SKOL AGO G.E.E. KROON TA ORGUYOSO DI BO