Sistema di Kompensashon i Likidashon di Pago na Kòrsou i Sint Maarten

Willemstad/Philipsburg – Centrale Bank van Curaçao en Sint Maarten (CBCS) a anunsiá publikashon di e informe riba Sistema di Kompensashon i Likidashon di Pago i Balor na Kòrsou i Sint Maarten 2020, un di e promé dokumentonan públiko den e serie Yellow Books.
‘E informe ta deskribí e aspektonan institushonal di mas importante relashoná ku e infrastruktura di merkado finansiero, e sistemanan prinsipal di kompensashon i likidashon interbankario i e uzo di e instrumentonan di pago na Kòrsou i Sint Maarten.
Tambe, e ta duna un deskripshon breve di e sistemanan di bolsa, komersialisashon di balor, registrashon di balor, i kompensashon i likidashon di bolsa den e Union Monetario’, asina Sra. Leila Matroos-Lasten, Direktor Ehekutivo di CBCS a splika.
E Yellow Book ta presentá informashon statístiko tokante pago na Kòrsou i Sint Maarten. E koló menshoná den nòmber di e publikashon (den e kaso akí, hel) ta indiká e region for di kua a optené e informashon.
For di 1999, CBCS ta partisipá den Western Hemisphere Payments and Securities Settlement Forum (WHF) ku e meta pa fortifika kapasidat riba tereno di operashon i supervishon di e sistemanan di kompensashon i likidashon di pago.
Den e kuadro ei, na 2018, CBCS a inisiá un proseso di reforma importante riba tereno regulatorio i di desaroyo, pa asina fortifiká e base riba kua e infrastruktura nashonal di merkado finansiero ta funshoná konforme e normanan internashonal.
Na 2020, a presentá un proyekto di ordenansa nashonal na e gobièrnunan di Kòrsou i Sint Maarten riba infrastruktura di merkado finansiero. Na mart di 2021, CBCS a publiká e último vershon di su Operating Rule Book pa sistema di pago.
‘Publikashon di e Yellow Book akí ta un paso krusial den CBCS su proseso pa mehorá transparensia i kalidat di dato statístiko riba sistema di kompensashon i likidashon di pago na Kòrsou i Sint Maarten’, Matroos-Lasten a bisa komo konklushon.
E informe ta disponibel pa downloaded for di wèpsait di CBCS: https://www.centralbank.cw/publications/reports