Sindikatonan ta insisti riba 6 porshento di plaka di fakansi

WILLEMSTAD – Gobièrnu a presenta ayera na e sindiktonan ABVO, NAPB, Straf i SAP, algun senario kue tin intenshon di ehekuta, den kuadro di suavisashon dje medidanan pa empleadonan publiko. E reunion tabata ku entre minister Ornelio Martina. Juan Lourens presidente di Straf, a splika na nòmber dje sindikatonan ku e posishon di sindikalismo no a kambia i ku e lei di gobiernu pa impone riba e benifisionan di fakansigeld, loontrede i indexering ta algu ku ningun momento sindikatonan no ta di akuerdo kune. ‘’Nos posishon a keda meskos ku na inisio; e amptenar mester tende ki dia e ta haña bèk tur loke ku e tin derecho riba dje’’, asina Lourens a splika.
Minister Martina a partisipa na e sindikatonan algun proposishon, den kua e mandatario entre otro a menshona 3 porshento di fakansigeld. Lourens: ‘’Nos a duna nos punto di bista ku pa nos, e mester ta 6 porshento’’. Riba esaki e sindikatonan a tende di minister Martina, ku durante dje reunion di konseho di minister awe, e ta trese e punto aki dilanti. Despues dje reunion ku su koleganan, minister Martina ta reuni atrobe ku e sindikatonan. ‘Pero pa nos, ta seis porshento nos ta preferá i tambe tur e otro benifisionan ku e amptenarnan tin derecho riba dje’’, Lourens a insistí.
Pa loke ta konserni e asuntu di loontrede, e sindikatonan a splika minister Martina ku e loontrede ta kana ku e 3 porshento lumpsum pa tur e amptenarnan ku ta pegá den nan maksimo. ‘’Esei tambe nos a pone bon kla riba mesa pa gobièrnu’’.

OPINION DIFERENTE
E proposishonnan ku gobiernu a presenta e sindikatonan ta mas amplio ku solamente e altura di e fakansigeld. Pero minister Martina ta prefera pa ainda no bai den detaye, pero ta limita su mes na e aspekto di fakansigeld, pa kua e amptenarnan tin mas interes pe.
Segun minister Martina, ela presenta ayera na e sindikatonan, e intenshonnan di Konseho di Minister pa propone na CGOA. Prome ku akudi na e Plataforma ofisial aki, minister Martina a organisa un enkuentro informal pa evalua e loke ku ta biba serka e sindikatonan. ‘’Esaki a duna e resultado ku nos a antisipa, esta ku nan ta di un otro opinion for di loke ku gobièrnu a trese dilanti’’.
Mas aleu minister Martina a bisa:’’Nan ke seis, nos tin tres porshento di fakansigeld, ta puntonan ku mester bai bek Konseho di Minister, lo mi splika nan opinion den Konseho di Minister, ku mester yega na un desishon, riba e loke ku e sindikatonan a trese dilanti’’.
Asuntu di loontrede tambe ta kosnan ku Konseho di Minister mester disidi riba dje.