Sindikatonan lo sigi papia ku gobièrnu riba prima di fakansi di 6%

WILLEMSTAD (D)– Gobièrnu ta den su pleno derecho pa paga gratifikashon na su empleadonan i e sindikatonan ku ta representa trahadonan publiko no tin nada kontra di esaki. Pero e gratifikashon di 1.750 florin pa empleadónan públiko i personal ku tin status igual, no ta remplasá e prima di fakansi di 6%, ku e sindikatonan lo sigi deliberá riba dje ku gobièrnu. Asina por konklui for di deklarashon di George Hernandez, presidente di ABVO. Hernandez: ‘’ Si ta trata di un gratifikashon konforme artikulo 75 di LMA, sindikato no tin nada di bisa kontra di esei. Gobièrnu por disidí ku e ta paga e 1.750 florin na su trahadónan.Semper nos a papia di e prima di fakansi di 6 porshento. E sindikatonan ta determiná pa sigi papia ku gobièrnu riba e asuntu aki’’.
Hernandez a menshona ku a base di artikulo 75 di LMA, ku ta papia di gratifikashon, – den e kaso aki ta gobièrnu ta disidi kiko e ta duna na su trahadónan- minister Martina a presentá e landsbesluit, kaminda ku e ta bisa ku ta duna tur amptenar i esnan ku status igual i dosentenan di skol, e montante di 1750 florin.
E sindikatonan a bisa minister Martina ku si ta trata di un gratifikashon no ta nesesario pa konvoká un asina yamá :’’bijzondere CGOA, manera ela pidi, pero ku e por ehekutá e parti di gratifikashon na su trahadónan.

KARTA PA
SEKRETARIO DI ESTADO
Mientrastantu e sindikatonan ku ta representá empleadonan públiko a manda un karta pa sekretario di estado, Alexandra van Huffelen, relashoná ku nan eksigensia pa definitivamente eliminá e rekorte di 12.5 porshento. Siman pasá na Kòrsou, durante reunion di e sindikatonan di empleadonan publiko di Kòrsou, Aruba, Sint Maarten i Surnam, a disidi ku e sindikatonan lo elevá e asuntu aki na nivel di Reino. Mandamentu ayera dje karta pa sekretario di estado van Huffelen, ta e prome akshon den e direkshon aki. Juan Lourens, presidente di Straf, a bisa ku e enfoke dje sindikatonan den e dianan benidero, lo ta dirigi riba e 12.5 porshento te ora ku e ta kompletamente for di mesa.
Mirando ku sekretario di estado Alexandra van Huffelen lo ta na Aruba e fin di siman aki, representantenan di Aruba, Kòrsou i Sint Maarten lo entrega van huffelen e karta kaminda ta fija posishon dje sindikatonan. Den e karta ta menshona entre otro ku empleadonan públiko só no por keda karga preshon dje medidanan.