Sindikatonan kontentu ku desishon riba ‘preferred bidder’

WILLEMSTAD – Sindikatonan ta kontentu ku porfin Konseho di Minister ayera a tuma un desishon relashona ku un preferred bidder pa refineria. Prinsipalmente e sindikatonan ku ta representá trahadónan na refineria tabata hopi pendiente pa e desishon aki. E hendenan a pèrde trabou i ku ta warda riba un posibel trabou bèk na refineria, ta en espera di e desaroyonan. E sindikatonan ta warda dos siman kaba pa haña sá kua desishon gobièrnu lo tuma. E situashon a bira mas tenso ora ku rumornan a kore ku tin divishon den gobièrnu, riba e konseho ku e komishon negoshado a hasi na gobièrnu.
Prome minister Gilmar Pisas, na final dje reunion di Konseho di Minister ayera, a bisa prensa ku gobièrnu a duna enkargo na un tim ku a hasi e head hunting, ku a eherse e tarea tambe i manda su proposishon pa Konseho di Minister pa tuma un desishon. Despues di Analisa tur e puntonan i konsehonan ku tin rondo di dje, Konseho di Minister a asepta integralmente loke ku e tim a propone.
E sigiente paso ta, segun premier Pisas, ku ta bai Hunta di Akshonista i ku e sigi ku e proseso konforme regla i prosedura. Esaki ta nesesario pa eksklui posibel claim of hasi fayo ku otro puntonan.
Apesar ku e nòmber dje grupo Giusti, ta menshoná ampliamente den komunidat, komo esun ku e komishon a rekomendá gobièrnu, premier Pisas, ta preferá pa no menshona ofisialmente ainda ku enberdat ta trata dje kompania aki.
‘’Pasobra te ainda mi mester bai hunta di akshonista i mester hasi sierto tramitenan i mi ta prefera pa na e momentu aki, no ta ami ta e persona ku ta menshona e nombe’’. Asina Gilmar Pisas a bisa. Enfatikamente e premier a konfirma ku ta loke ku RDK i su direktor a sugeri gobièrnu.
Gilmar Pisas a remarka ku interes di pais ta mas importante ku tur kos i ku por spera ku gobièrnu lo ta transparente i tur informashon tambe na Raad van commissarissen di RDK, riba e desishon ku ela tuma ayera.
Minister President no ta verwagt ku di parti di gobièrnu lo tin otro proposishon pa e Partido ku a skoge pa kontinua ku refineria Isla. Gobiernu ta kalkula ku den dos luna, e partidonan involvi por akordá riba e aspektonan ku ta regarda kontinuashon dje refineria.