Sindikatonan i VBC: Kon ta bai sigui atendé ku refineria ?

WILLEMSTAD – Sindikatonan i Asosashon di Komèrsio ta ansioso pa sa kon gobièrnu ta bai sigi atende ku refineria di Korsou, despues dje veredikto di wes e siman aki den e kaso di Clean Air kontra di gobièrnu. Den e kaso aki, hues a indika ku gobièrnu mester kumpli ku normanan internashonal konforme stipulashon di e Organisashon Mundial di Salú. Habitantenan tin derecho riba airu limpi i e organisashon di medio ambiente, ta lucha fuerte pa Kòrsou kumpli ku esaki.
Gherrel Remilia, presidente di APRI, a bisa ku den un reunion ayera a disidi ku e sentralnan CGTC, SSK i SSS i Asosashon di Komersio, VBC, ta pidi un reunion urgente ku gobièrnu pa djabierne awor, riba e efektonan dje veredikto riba e proseso pa habri refineria.
E desishon pa konhuntamente aserka gobièrnu pa e reunion a kai durante di un enkuentro dje partidonan ayera. Remilia:” Den e reunion ei nos a papia riba diferente tema di importansia ku ta regarda Kòrsou i nos a papia tambe di refineria. E tres sentralnan i VBC a indika ku nan tambe lo ke sinta den e reunion huntu ku nos, e dos sindikatonan di refineria, pa dialoga ku gobièrnu riba e tema di refineria despues ku e veredikto a bira konosi.’’
Segun Remilia, e partidonan ta di opinion ku ta importante pa tin un lei di medio ambiente. Nos ta kere ku e úniko opshon ku a keda aworaki, ta e lei di medio ambiente ku ta pendiente. Gobièrnu mester traha riba dje i dune prioridat.
Mas aleu e sindikalista indika ku ta un hecho ku aworaki Korsou ta depende hopi di turismo.
Pero a bira tempu pa diversfika i den e kuadro ei, refineria por duna kontribushon. Prinsipalmente si tene na konsiderashon ku turismo tambe por ta sensativo, si mira kiko ta pasando ku e balor di euro ku ta bahando. Remilia:” Nos turismo ta prinsipalmente for di Oropa i den e kaso aki e euro a kai i esei por afekta ku e turismo for di Oropa.’’
E invitashon ku a bai pa gobièrnu ta pa reuni na sede di PWFC, kaminda ku tin sufisiente espasio pa akomoda, e partsipantenan na e reunion, Remilia ta bisa.
E presidente di APRI ta konvensi ku tin solushon pa e problematika. Den e proseso ku ta tumando luga pa un operado nobo, a fija kiko mester hasi pa start e refineria.
Segun Remilia enberdat ultimo tempu no a inverti manera mester ta, pero aworaki tin kaminda pa kana pa garantisa un medio di ambiente mas limpi ku den pasado. E asuntu ta ku e ta kosta sèn i ta mará na tempu. Si mester apliká e normanan internashonal mesroa, e kantidat i sèn ku mester inverti den 10 aña mester tuma luga den menos tempu. Esei por pone un operador hala atras. Ta pesei e partidonan ke sinta na mes ku gobièrnu pa wak kon por solushona e problema aki.