Sindikatonan di Kòrsou i Aruba ta serando fila pa enfrentá Sekretario di Estado

WILLEMSTAD. Direktiva di e sindikatonan ABVO, SAP, NAPB, STrAF, STSK i DOEN a informá ku manera palabrá nan ta organisando i kompilando tur dato i informashon nesesario pa na momentu ku nos bolbe yama i invitá boso na e próksimo reunion general konhunto.
Nan tin un pakete kompletu di informashon ku miembronan por haña pa asina disidí kon ta sigui i pues kua ta e siguiente pasonan ku nos ta bai dal huntu!
Na e momentunan akí, despues di e bishita di nos kompañeronan di Aruba i St. Maarten, tabatin i ketu bai tin hopi desaroyo interesante.
Desaroyonan ku komo dirigente nos mester a aktua mesora pa no pèrdè ‘momentum’. Un di e desaroyonan akí ta e bishita inesperá di Sekretario di Estado van Huffelen na Aruba.
Den e kuadro akí nos a disidí pa perkurá pa van Huffelen haña e karta, ku nan a traha huntu ku nan kompañeronan di Aruba i St. Maarten, personalmente. Den e mesun rosea lo splika van Huffelen personalmente kiko ta nos posishon pa ku e rekorte di 12,5%.
Otro desaroyo ta ku djabièrnè awor 17 di yüni 2022 pa 9’or di mainta Staten lo trata e mesun tópiko akí esta e rekorte di 12,5% den sektor públiko i enseñansa.
Komo dirigentenan nos lo sòru di ta presente den sala di parlamento pa wak nos parlamentarionan den nan kara i skucha kiko kada un tin di bisa riba e inhustisia akí 2 aña despues ku den e mesun sala akí un mayoria a koperá ku esaki.
Pues kompañeronan keda pendiente pasó un ora pa otro nos lo yama e reunion general konhunto manera palabrá pa duna tur detaye di e último desaroyonan i alabes splika kiko nos a palabrá ku nos kompañeronan di Aruba i St. Maarten!
Keda pendiente!