Sindikatonan di empleadonan públiko ta vigilá desaroyonan di pago di gratifikashon

WILLEMSTAD – E sindikatonan ku ta representa empleadonan publiko, ta pendiente dje desaroyonan relashona ku entre otro pago dje gratifikashon di 1750 florin ku gobièrnu tin intenshon pa paga empleadonan publiko.
Amado Vilchez, vise presidente di SAP a bisa ku Gobièrnu a disidi ku e ke paga su trahadónan 1750 florin. Gobernador a hasi algun pregunta na gobièrnu riba e asuntu aki.

A base di esei, gobièrnu ta bai hasi su trabou kontestando e karta di Gobernadó. Ora ku e kontesta di gobièrnu ta klá, Gobernadó por hasi dos kos, duna su aprobashon si òf no.

E sindiktonan mester warda pa wak kiko ta bai sosode .
en kaso ku Gobernadó bai di akuerdo no tin problema pa e sindikatonan.

Nan lo sigi traha pa eliminá rekorte di 12.5 porshento, pasobra ta esei ta loke ku ta primi mas tantu serka e amptenarnan.

Den kaso ku Gobernadó no duna su aprobashon, ora ku yega asina leu e sindikatonan ta disidi kon ta sigi atendé.
Vilchez a remarka ku mester tene kuenta ku otro stakeholdersnan ku tambe mester disidi. Entre otro e sindikato a menshona CFT. ‘Ta pesei kada un dje aktornan aki basá riba nan responsabilidat mester aktua i tuma un desishon.’
Algun dia pasá e sindikatonan a entrega un petishon na sekretario di estado, Van Huffelen, pa elimina e rekorte di 12.5 porshento pa empleadonan publiko.

Hulanda ta insisti sinembargo ku mester pasa e lei di nivelashon di salarionan altu, promé ku Korsou haña permit pa kita e rekorte.

Aki tampoko e sindikatonan no a tira e sèrbete den ríng.
Amado Vlichez, vise presidente di sindikato SAP a bisa ku na Aruba e sindikatonan a hasi loke ku nan a planea i ku na nan regreso na Korsou, e trabounan a kontinua. Di tur manera e mákina di sindikato den sektor públiko no ta para ketu.