Sindikato DOEN ta selebrá su di dos aniversario ku sentimentu miksto

WILLEMSTAD – Sindikato DOEN ta konstatá ku koleganan den enseñansa ta haña konfiansa bèk den sindikalismo. Esei ta un dje puntonan ku sindikato DOEN ta konstatá durante di su dos aña di eksistensia. Awe e sindikato ta rekordá ku awe ta hasi dos aña ku DOEN a surgi for di un reunion general ku vèlt di enseñansa na SRS, antes Klup di Shell, ku alabes awe ta su kas sindikal.
DOEN! di un banda kontentu di por selebrá su di 2 aniversario. Di otro banda indigná ku ainda no a kumpli ku su dosente A pa B/B pa C, 27 ora pa henter enseñansa avansá. ‘’I ketu bai nos tin e rekorte di 12,5% den nos stròt!’’, asina sindikato DOEN ta remarká.
E sindikato ta satisfecho ku poko poko pero sigur koleganan den enseñansa ta hañando konfiansa bèk den sindikalismo. ‘’Tiki tiki koleganan ta halando serka pa forma un bloke hasiendo e moketa di DOEN tur dia mas grandi’’. Un moketa ku ta simbolisá lucha, determinashon i konsistensia pa logra tur nos metanan. E metanan mas importante ta un mihó kondishonnan laboral, enseñansa di kalidat ku na su turno lo perkurá pa mihó desaroyo di nos pais, segun DOEN!
DOEN ta gradesido na tur nos kompañeronan sindikal ku a sa di habri nan brasa solidario risibiendo DOEN komo organisashon sindikal den e arena difisil ku yama sindikalismo. Kada un brasa solidario ta kontribuí na mas forsa representando i bibando e union sindikal ku klase trahadó mester i meresé.
Un danki spesial DOEN ta manda pa su kompañeronan den CCvV ku a sa di biba sindikalismo su fundeshi ku ta “Solidaridat!” embolbiendo DOEN den tur aktividat sindikal pa huntu forma un bloke sindikal mas grandi i mas fuerte pa haña bèk e 12,5% ku a kita for di trahadónan.
Un mihó enseñansa i un mihó pais!”
”Na nòmber di direktiva i shopstewardnan di DOEN; Danki i Pabien ku nos di 2 aniversario!”