Sindikato APRI ke sa kiko ta intenshon real di Clean Air Everywhere

WILLEMSTAD – Sindikato APRI ta preokupa ku e kaso sumario ku Clean Air Everywhere i a kuminsa kontra gobièrnu di Kòrsou, pa pa evitá ku ora e refineria habri, ta viola standartnan internashonal di medio ambiente. APRI ta teme ku e eksigensianan di Clean Air Everywhere por stroba reapertura dje refineria.
‘For di 2013 ta buskando un operador nobo pa refineria, sin ku po logra. Awora ku ta serka di haña un operador, nos ta konfrontá ku e kaso, manera esun di Clean where everywhere’. Asina Gherrel Remilia, presidente di APRI, a bisa na Radio Hoyer.
Segun Remilia, tur hende ta di opinion ku polushon en general ta malu pa salú di hende i ku no por start e refineria via dje mesun forma, ku e tabata opera.
Ta pesei na diferente okashon e sindikato a reuni ku gobièrnu i a papia riba e topiko aki ku aki ku RDK tambe. E intenshon ta pa determina kon ta yega na formanan nobo pa kombati e polushon. Remilia, a splika ku e por a sinta na mesa di negosashon ku CORC. Den e kuadro ei a traha huntu ku GMN, plannan pa ora ku start bèk e refineria: no ta bai usa e mesun kombustibel ku a usa den pasado . Esei ta nifika kaba un kambio grandi. Remilia: ‘’E polushon lo baha drástikamente ora ku bolbe start e refineria’’.

MAS FAKTOR
Pero tin mas ku ta hunga un ròl. Gherrel Remilia ta splika: ‘’Pa baha e polushon, i tambe e emishon na e standartenan internashonal esaki ta rekeri invershonnan kuantioso. Ta pesei e ta mará na kantidat di aña. Pasobra e dekreto ministerial ku tin aktualmente ta bisa ku pa añanan 2020 pa 2025, e polushon mester baha tantu. Di 2025 pa 2030, atrobe un kantidat i ku pa 2035 mester alkansá e normanan internashonal.
APRI ta preokupa pasobra e no sa presis kiko ta e intenshon di Clean Air Everywhere. Si ta obliga gobièrnu òf e operadó nobo pa kumpli ku e standartnan ku tin. Of ku nan ta pidiendo pa bai mesora na e kondishonnan internashonal. E standartenan internashonal ta muchu mas abou. Den kaso ku Clean Air Everywhere ta eksigi e normanan internashonal mesora, e ta hasi e situashon pa e refineria na Kòrsou hopi kompliká. Asina por konklui for dje deklarashon di Gherrel Remilia.
Remilia ta konvensi ku huntu nos por traha riba e parti polushon. Pero no ta realista pa sali pone preshon aworaki mesora pa kumpli ku e standartenan internashonal. Si ta esei ta e meta di Clean Air Everywhere, por konkluí ku e ta un intenshon di mala fe. ‘’Pasobra e ora ei nan no ke pa e refineria start’’.

TRAHADONAN PENDIENTE
Remilia a sigi bisa ku den dos dia tabatin más ku 700 hende a inskribi òf registrá pa traha na refineria. Esei ta duna un señal klá ku e hendenan ta warda riba trabou. ‘Si Clean Air entama un kaso i stroba e refineria di start, mi ta kere ku komunidat di Kòrsou, mester lanta mustra su kara’. Pasobra kada ken ku tin un trabou na e refineria ta perkurá pa kuminda pa por lo menos un famia di kuater.
APRI ta vigilá e desaroyonan hopi di aserka pa sa kiko ta e intenshon di Clean Air Everywhere. Si e ta bai obliga gobièrnu pa kumpli ku e normanan òf ku e ta eksigi algu ku ta imposibel ku ta pone ku e refineria no por start.