Sin ku a reparti nada ainda….. Ruman a krea broyo pa anulá ehekushon di tèstamènt válido

AMSTERDAM. Djamars ultimo e tribunal pa kasonan di deurwaarder i notario na Amsterdam a atendé kehonan di un yu ku nan a traha tèstamènt pe mama i tata pero kos a bruwa na kaminda.

Kos a bruwa pió ainda ora e mama a fayesé i a keda na e tres yunan pa manehá e situashon.

Na final di su bida e mama tabata demente i su kasá tabata biba den un apartamento banda dje Kas pa Grandinan.

Un sosio dje konsultorio di notario a pasa tèstamènt dje mama na bida pero e yu homber ku a keda enkargá pa kuida e tata dado momento a hisa su bela bin Kòrsou.

Den e situashon e yu homber ku a keda Hulanda a keha e notarionan ne tribunal disiplinario pa notario  ku nan no a reaktivá e protokòl di inkompetensia mental riba e mama. I por lo tantu e ke kambia e tèstamènt.

I esei siendo ku tabatin señal ku nan ta neglishando bienestar dje tata i hasta a maltrat’é.

Aña pasá e tribunal a trata e keho dje yu kaminda nan a repasá e Tèstamèntnan dje mayornan dje yu ku a keha nan.

E kaso a trata di dos tèstamènt kaminda e mama a asigná su kasá komo ehekutor dje tèstamènt si e fayesé promé i den kaso dje tata  igual.

Den kaso ku tur dos fayesé,  nan a nombra ruman di e yu ku a keha e notarionan i su ruman muhé komo apoderado.

Dado momento a surgi un traba den sentido ku ruman ku tabata apoderado a bin biba na Kòrsou na yanuari di 2020.

E dos rumannan ku a keda Hulanda a firma un akuerdo ku kondishonnan nobo afirmando ku e akuerdo ta válido pa nan so.

BÒM A REMENTA

Aña pasá e personal ku ta kuida e tata a hasi denunsia na Veilig Thuis ku supuestamente e personal di kuido a maltratá e tata.

Mesora ela tuma paso pa pone propiedat dje tata bou di kuratela na tribunal di Zwolle i a pidi e notarionan pa de-aktiva e tèstamèntnan.

E notarionan a ninga riba kual ela hiba nan korte.

Den un otro relato den e edishon di awe nos lo revela ki desishon e tribunal di Zwolle a tuma.