Simpatisadó di Bolsonaro a instalá bòm den trùk di kombustibel

BRAZILIA – Robson Candido hefe di PCDF (Policía Civil del Distrito Federal) a konfirmá ku den fin di siman ku a kaba di pasa nan a logra interseptá un bòm ku tabata instalá den un trùk di kombustibel ku tabata destiná pa bai yena kombustibel pa avion na aeropuerto internashonal di Brazilia.
Despues ku agentenan di seguridat a interseptá e bòm aki outoridatnan a hasi nan trabou di investigashon i ku a bin kondusí na aresto di un fanátiko di Jair Bolsonaro.
E fanátiko di Jair Bolsonaro a keda identifiká komo George Washington de Oliveira Sousa (54) ku ta esun ku a instalá e bòm aki. Mesora outoridatnan a detené George Washington de Oliveira Sousa i ku ela bin konfirmá ku ela haña yudansa di vários persona pa kometé e atentado aki.
E intenshon di George Washington de Oliveira Sousa tabata pa krea un káos un siman promé ku investidura di presidente Luiz Inacio Lula da Silva ku lo mester keda selebrá dia 1 di yanüari próksimo.
George Washington de Oliveira Sousa mes ta biba na e suidat di Para pero for di Novèmber ta na Brazilia pa huntu ku algun otro fanátiko di Jair Bolsonaro kometé e atentado.
Robson Candido a splika ku agentenan federal na Para a tene entrada hudisial na kas i negoshi di e detenido i a bin haña vários arma i mas ku 1.000 munishon.