Siman pasá e veredikto a kai. YDK (22) a kaba di sinta su kastigu pa kontrabanda di 800 gram di koka

WILLEMSTAD. Un kurasoleño ku a kometé e estupides di bai pasa 800 gram di kokaina for di Kòrsou pa Schiphol a kaba di sinta su kastigu na Ulanda i ta kla pa sea keda Ulanda òf retorná Kòrsou despues ku Marechaussee a gar’é ku e droga dia 10 di òktober di aña pasá na Schiphol.
Originalmente ela haña e mesun kastigu serka e wes polisial i den apelashon korte a konfirmá e kastigu di 7 luna.
Lo interesante dje kaso ta ku e hòmber mester a siña su lès despues dje eksperensia amargo aki òf manera su abogado a splika korte, e no ta mal hende. E ta un persona amabel, e no tabatin karchi di E tabatin un bon trabou i ta kuida su abuelo serka kende e ta biba.
Ta malvadonan a pone preshon riba dje pa aktua komo mula despues ku ela dal un outo ku ela alkilá i no por a paga e daño material.
Si e bai será atrobe despues di su detenshon preventivo, e chèns ta grandi ku el a pèrdè su trabou i ta kai den depreshon.
E abogado a pidi korte pa duné un kastigu kondishonal igual ne tempu ku ela pasa den detenshon preventivo i un kastigu di trabou ku e por traha na Kòrsou mes.
Korte en kambio a mustra riba e otro banda di medaya a tuma un desishon basá riba seriedat dje kaso i e kantidat i e sirkunstansia bou di kual ela kometé e hecho.
E kantidat ku ela purba importá tabata pa bende riba merkado.
E argumento tradishonal ku korte ta uza pa husga un delito asina ta ku distribushon di kokaina ta sosodé den kombinashon ku vários forma di kriminalidat.
Den kasonan asina kastigu di prizon inkondishonal ta obligatorio i tin un lata pa midi seriedat dje kasonan.
Ningun dje argumentonan ku e abogado defensor a uza no ta konta den e kaso aki ni ku e tin karchi di kastigu limpi.
Por lo tantu e tribunal no a hasi kaso dje proposishon dje abogado.
Riba e fecha en kuestion 7 luna pasá a kondené na 7 luna di prizon inkondishonal ku ela kaba di sinta dia 3 di òktober último.