Siman di Deaxo Croes, Punta pa Punta (Crossing for Prevention)

ORANJESTAD – Deaxo Croes, atleta Arubiano ku ta pronto lo realisá e hazaña di Crossing for Prevention, tin un antesala prepará pa e siman aki ku yama Punta pa Punta. Djasabra awó, 1 di òktober, e ta landa for di Arashi pa Baby Beach. Deaxo ta entrenando hopi duru i ta totalmente enfoká pa kompletá e trayekto di mas o ménos 34 kilometer stret.
Relashoná ku esaki, e ekipo tras di Crossing for Prevention ta anunsiá ku lo tin vários punto for di unda sostenedó i públiko por bin wak i apoyá miéntras ku Deaxo ta den akshon. Ta importante pa keda pendiente di e página di Facebook Crossing for Prevention kaminda ta bai publiká e lugá eksakto i ora ku ta yegando na kada un di e puntonan. Deaxo mes lo kuminsá landa entre 2’or pa 3’or di djasabra mardugá i ta kalkulá ku lo yega Baby Beach promé ku solo baha.
Na mesun momento ta hasi un invitashon na tur landando ku ta deseá pa djòin Deaxo den e área Mangel Halto i landa huntu ku ne e parti aki di e ruta. Ta enfatisá ku kompañá Deaxo den awa ta posibel solamente na Mangel Halto y ningun kaminda promé òf despues pa motibu di siguridat.
Crossing for Prevention mes ta tuma lugá dia 19 di Novèmber 2022. Esei ta e fecha riba kual Deaxo lo landa for di Boneiru pa Kòrsou den un hazaña físiko ku ningun otro persona a yega di hasi. E ophetivo di e inisiativa aki ta rekoudá fondo pa fundashon na e islanan ABC ku ta dediká nan mes na e prevenshon di kanser. Ta trata di Fundashon CORESA Aruba, Kanker Fonds Bonaire i Caribbean Prevention Center Curaçao.
Pero no mester warda djasabra awó, ni dia 19 di novèmber pa kuminsá yuda. Ya kaba por bishita
www.crossingforprevention.com i kontribuí fásilmente dor di klik riba e boton oraño ku e palabra
‘sponsorship’. Kada florin ku ta aportá ta bai direktamente na e logístika di Crossing for Prevention.
Ta deseá Deaxo Croes hopi éksito den Punta pa Punta i ta yama danki na un i tur ku ta aportando, di un manera òf otro, na hasi Crossing for Prevention un realidat. Danki partikular ta bai pa e patrosinadó prinsipal Aruba Bank, Orco Bank, ASD, Cas Bon, Kooyman, ASD, Sun Bum, Alimenta, BITE! Communications, CR38TE, Verbum Works i demas partners ku ta aportando.