Sifranan real ta refutá ku gastunan di atministrashon di SVB lo ta haltu

WILLEMSTAD. Durante tratamentu di estado di salú i kuido mediko den nos pais e siman aki den parlamento, e tema di e gastunan di atministrashon di Banko di Seguro Sosial tambe a subi tapete.
Minister di Salubridat Janga tabata responsabel pa reakshoná riba e pregunta i opservashonnan ku tabatin den parlamento i riba e forma defisiente ku ela hasi esaki nos a komentá kaba e siman aki.
Sinembargo e tema di Salubridat t’asina amplio i importante ku no por laga sierto detayenan bai hiba nan mes bida den desierto sino trese nan na konosementu di opinion publiko.

GASTUNAN DI SVB
E minister a splika ku ta konosi ku e gastunan di atministrashon di SVB ta haltu, den e kaso aki e ta kosta 44 mion florin pa TUR FONDO ku SVB ta atministrá.
No solamente gastunan di malesa manera talbes tin hende por ta pensa.
E montante aki ta 4% di e gastunan total di SVB su maneho atministrativo i pa haña un idea ku si e ta rasonabel, mester hasi un komparashon ku gastu di otro bankonan di seguro sosial den region.
Pa yega na un idea kiko e gastunan ta, SVB ta mira kuantu i na unda por baha gastu i den ki periodo.
Gobiernu a disidi ku mester baha 23% di gastu di atministrashon o sea 9 mion florin pa aña.
Por baha gastu bahando e sueldo i kondishonnan sekundario ku 12.5% manera gobiernu a dikta.
Esei lo bai riba lomba di e personal pasobra lo mester skrap plaka di fakansi, adaptashon di sueldo na kosto di bida, i oumento di salario i no ta tuma personal nobo den servisio pa personal ku baha ku penshun of ku retiro.

KOMPARASHON KU OTRO ISLANAN
Riba e pregunta kon ‘nos’ SVB ta kompará ‘costwise’ ku SVB/Aruba, e porsentahe riba presupuesto di SVB Kòrsou ta 4.1% i SVB Aruba ta 5.3%.
Atministrashon di gastunan di fondonan BVZ ta 3.1%, na Ulanda e ta 3.4%, na Aruba 4.1% i na islanan BES e ta 4.1 “porshente!” E dikshon teribel ku e minister a apliká ta gratis!
Dia 4 mart Task Force a saka un konseho nobo pa gobiernu na 2019 ku ta traha riba Task Force a informa ku mester krea fondo pa CMC i SVB ta hasiendo esei for di aña pasá pa loke ta remedi, pago na spesialista i biahenan pa eksterior.