Siendo kompania privá…… Inisiativa pa debati servisio di FLOW ta hopi prematuro

WILLEMSTAD. Awe mainta komishon sentral di parlamento a start ku un diskushon riba e prestashon di e kompania di telekomunikashon FLOW ku praktikamente a bira su monopolio na Kòrsou.
E intenshon tabata pa e tres personanan di MFK ku a pidi e reunion a debati riba e servisio ku e kompania ta duna i kiko gobiernu por hasi pa regulá esaki pero minister Cooper a sofoká e intenshon aki praktikamente den tòm pasobra e lei ku tin ku regulá e materia, no ta ni kla pa bai pa Raad van Advies.
I sin e komentario di Raad van Advies ta aire kayente por dediká ne tempu.
Sinembargo manera Cooper mes a opservá, despues di 9 aña di tabata sintá ne otro banda di sala den banki di oposishon, awe e tabata hasié for di banki di gobernashon.
Pero tabata ku sintimentu miksto pa kuminsa for di e skina ku a bin e petishon pa e tene un introdukshon no tabata e skina mas logiko.
I banda di esei, na momento ku a bende UTS, nos no tin nada mas di bisa riba un entidat privá ku literalmente “…nos a kita for di nos kurpa….”
Loke sí e por a hasi awe mainta ta lo mas korekto pa papia riba servisio di telekomunikashon i Internet en general pasobra e no por papia ni bon ni malu di FLOW.
Ta riba e servisio ku UTS/FLOW a duna komunidat e por papia.