Sidney Bito, hefe di “Security”: “Entre públiko nos ta traha… Nan a sorprendé nos”…

Deporte 5 Star a kombersá ku Sr. Sidney Bito ku ta hefe dje “security” ku a bin ta hasi masha bon trabou den stadion (nan) aki na Kòrsou.

I Sidney kier a splika loke ku realmente a sosodé paso masha hopi hende ta puntra kon bin fanátiko a subi riba tereno di wega. Esnan ku sa bai stadion Rignaal Jean Francisca sa ku e konstrukshon ta otro, i kaminda ku hungadónan ta move di kamerin pa tereno di wega no tin un tùnel será manera den stadion Ergilio Hato.

Esei ta nifiká ku e miembronan di “security” ta traha kaminda e públiko ta kana pasa ora ku e wega ta aden.
Sidney ta splika ku rèfri dje wega a hasi seña ku nan pa drenta tereno, paso nan tin di protehá rèfri. Ora ku kolega “Juni” Bito a drenta, fanátiko a sorprendé nan pasa bai aden.

“E struktura dje stadion ta otro, ta entre fanátiko nos tin di traha.

Na masha hopi okashon fanátiko ta reklamá nos ku nos ta traha kaminda ku nan tin di kana pasa”, asina Sidney Bito a splika.

E hefe di “security” a bisa ku tur hende ta papia, pero nan no ta papia ku nan ku ta den e kayente dje trabou.