‘Shop’ online sin preokupashon… Pago digital ku tarheta di Visa awor ku mas seguridat

WILLEMSTAD – Banco di Caribe ta keda alsa kalidat di su produkto i servisionan kontinuamente.
Den proseso pa sigui inová pa trese solushonnan moderno ahustá na e tempu aktual i pa alsa seguridat riba pagonan digital, pronto bo por disfrutá di e servisio nobo di verifikashon di identidat, Visa Secure, na momento ku ta hasi pago digital ku tarheta di krédito Visa òf tarheta prépago MultiCard.

Visa Secure
E sistema nobo di verifiká identidat na momento ku ta hasi pago digital riba un wèpsait ku ta partisipá na e programa aki, ta komprobá ku e usuario ta e doño di e tarheta. Promé ku finalisá kada transakshon digital, e doño di e tarheta mester konfirmá su identidat. E chèns pa un otro persona hasi uso di e tarheta i kometé froude ta limitá. Di e manera aki ta alsa e nivel di seguridat di pagonan digital ku e tarhetanan menshoná.

Kon e sistema aki ta funshoná?
Tur kliente por sigui hasi pago digital ku nan tarheta di krédito Visa òf MultiCard manera di kustumber. Despues ku bo yena e informashon di bo tarheta i finalisá bo transakshon, un pantaya lo paresé indikándo ku bo mester skohe e método ku bo ta deseá pa risibí bo kódigo di verifikashon ku ta konsistí di 6 sifra. Por skohe pa risibí e kódigo via di SMS òf via di email. Na momento ku bo skohe e método preferí, lo bo risibí e kódigo i seguidamente por yena esaki den e rúbrika konserní. Finalmente mester primi ‘submit’ pa finalisá e proseso. Despues di algun sekònde e sistema ta verifiká bo identidat i dirigíbo bèk na e wèpsait kaminda bo por kompletá bo kompra. Den kaso ku e wèpsait no ta partisipá na e programa di Visa Secure, lo bo no risibí e mensage pa verifiká bo identidat.