SHOFÙR TA PÈRDÈ KÒNTRÒL I BÒLTU RIBA KAMINDA DI RINCON

Kralendijk – Ayera djadumingu algu despues di 6:30 di atardi notifikashon a drenta na warda di polis ku un aksidente di tráfiko a kaba tuma lugá riba kaminda di Rincon. Aki un outo mester a bòltu. Mesora a dirigí patruyanan polisial pa e sitio indiká. Na yegada a bin topa ku un Toyota Yaris Blanku riba su dak i ya e shofùr a logra sali.
E shofùr ku tabata mustra un tiki kansá a indiká ku e tabata rumbo pa Rincon ku un velosidat di 80 km pa ora i a pèrdè kòntròl riba su bolante den un bògt, drenta mondi i a bòltu.
Personal di ambulans a atendé ku e shofùr ku tabata e úniko okupante di e vehíkulo ku tabata keha di doló na altura di su rudia. A opta pa transporté pa hòspital pa kòntròl i tratamentu médiko mas avansá. Polis a guia tráfiko i CRS a presentá pa dokumentá loke ku a sosodé. Kortesia Nos.tv.