Shofer di 63 aña a pèrdè su bida den trafiko

WILLEMSTAD. Djasabra 27 di novèmber 2021 alrededor di 23.18’or, Sentral di Polis a risibí diferente yamada di habitantenan den área di Roi Soto ku nan a tende un zonido fuerte. Mesora a dirigí un unidat di Barber den e área i na su yegada a bin topa ku un vehíkulo parsialmente di bòltu den e labadó. For di investigashon preliminar ku polisnan di tráfiko a realisá na e sitio, a sali na kla ku shofùr di un outo di famia tabata kore riba Kaminda Serapio A. Pinedo den direkshon wèst. Pa motibunan te ainda deskonosí, e shofùr aki a pèrde kontrol riba su stür, zwai ku e vehíkulo i bai dal ku e parti patras kontra di un palu di manzaliña na e otro banda di kaminda. Despues e vehíkulo a bira parsialmente di banda. Debí na e impakto fuerte, e shofùr aki ku no tabatin su faha di seguridat bistí, a wordu saká for di su outo i a bai resultá riba suela. El’a fayesé na e sitio mes debí na multiple leshon ku el a sufri. Alrededor di 00.29’or dòkter di polis a konstatá morto di e hòmber Naichel Gregory Sambo, di 63 aña di edat nase na Kòrsou.

NINGUN KLASE
DI SIGURIDAT
Polis ta tumando nota ku e último aksidentenan fatal ku ta tumando lugá, e shofùr di outo no tabatin su faha di seguridat òf e motosiklista no tabatin su hèlmu bistí. Un yamada un bia mas di konsientisashon pa bisti bo faha of bo hèlmu, ya ku esaki ta limitá leshonnan na momentu di un aksidente.